Өмнөд Солонгосын нийслэл Сөүл хотын Хонгдэ хэсгийн гудамжинд мансууруулах бодис хэрэглэсэн үедээ нэгэн эмэгтэйг араас нь дагасан 20-иод насны монгол эрэгтэйг баривчилж, прокурорт шилжүүлжээ.

Сөүлийн Мапо дүүргийн цагдаагийн газраас өнгөрөгч лхагва гарагт мэдээлснээр, Хар тамхитай тэмцэх тухай хуулийг зөрчиж, барилгад хүчээр нэвтэрсэн хэрэгт сэжиглэгдэж буй "А"-г энэ сарын 3-ны өдөр прокурорт шилжүүлсэн аж. Тодруулбал, "А" нь өнгөрсөн аравдугаар сарын 26-ны өдөр мансууруулах бодис хэрэглэсэн үедээ Хонгик их сургуулийн метроны буудлын ойролцоо шөнөжин тэнүүчилсэн бөгөөд өглөө ажилдаа явж байсан эмэгтэйг дагасан байна. Ингээд тус эмэгтэйн мэдүүлгийн дагуу цагдаа нар хяналтын камерын бичлэгт шинжилгээ хийж, мөрдөн байцаах ажиллагаа эхлүүлсэн ба улмаар сэжигтнийг дараа өдөр нь буюу аравдугаар сарын 27-нд Дундэмун орчмоос баривчилжээ.

Цагдаагийн байгууллагын хяналт шалгалтын үеэр "А"-гийн цүнхнээс нэг тариур, 1.5 гр метамфетамин илрүүлсэн нь 50 орчим хүн хэрэглэх боломжтой хэмжээ аж. Мөн "А"-гаас мансууруулах бодис илрүүлэх энгийн шинжилгээ болон Үндэсний шүүхийн шинжилгээний албаны нарийн шинжилгээ авахад бүх хариу "Эерэг" гарчээ.

Эх сурвалж: Munhwa Ilbo

---