Оросын цэргийн хүчний сумны нөөц дуусаж байгаа гэв

Украины арми ОХУ-ын "туйлдсан" цэргийн хүчний эсрэг амжилттай тэмцэж, дайны явцыг эргүүлж байгаа гэж Их Британийн кибер тагнуулын Засгийн газрын харилцаа холбооны штабын дарга Жереми Флеминг мэдээлжээ.

Оросын цэргүүд өнгөрөгч даваа гарагт Украин даяарх хотуудыг бөмбөгдсөн ч Москвагийн сумны нөөц дуусаж байгаа ба Ерөнхийлөгч Владимир Путины шийдвэрүүд алдаа дутагдалтай байгааг тэрээр мөн тэмдэглэсэн байна. Түүнчлэн дайны эхэн үед эзэлсэн газар нутгаа алдаж эхлээд буй ОХУ-ын хүчин Украинд их хэмжээний хохирол амсаж буйг хэлсэн юм.

Ерөнхийлөгч Путин хоригдол болон цэргийн туршлагагүй хүмүүсийг дайчилж эхэлсэн нь "цөхөрсөн нөхцөл байдал"-ыг илтгэж буйг дурдсан ноён Флеминг "Путины эргэн тойронд үзэл бодлыг нь үр дүнтэйгээр сөрөх хүн байхгүй тул тэрээр буруу шийдвэрт хүрч, стратегийн алдаанууд гаргаад байна" хэмээн дүгнэжээ.

Их Британийн кибер аюулгүй байдлын тагнуулын агентлаг нь энэ оны гуравдугаар сард гаргасан тайландаа мөн Украин дахь Оросын зарим цэрэг тушаал биелүүлэхээс татгалзаж, өөрсдийн техник хэрэгслийг хорлон сүйтгэж байгаа гэж мэдээлсэн билээ.

Эх сурвалж: BBC