ОХУ Умард Солонгосоос олон сая пуужин, сум худалдаж авч байгаа гэв

ОХУ-ын Батлан ​​хамгаалах яам Украин дахь түрэмгийлэлдээ ашиглах зорилгоор Умард Солонгосоос олон сая пуужин, их бууны сум худалдаж авч байгааг АНУ-ын тагнуулын албаныхан мэдэгджээ.

Москвагийн зүгээс ийнхүү Умард Солонгост хандсан нь "Оросын арми экспортын хяналт, хориг арга хэмжээний улмаас Украинд нийлүүлэлтийн ноцтой хомстолд орсон хэвээр байгааг харуулж байна" гэж АНУ-ын албаны хүн хэлсэн байна. Түүнчлэн оросууд цаашид ч Умард Солонгосоос цэргийн нэмэлт техник хэрэгсэл худалдаж авч магадгүй гэж шинжээчид үзэж байгаа юм.

ОХУ-ын цэргийн хүчин өнгөрсөн наймдугаар сард Иранд үйлдвэрлэсэн нисгэгчгүй онгоцнуудыг хүлээж авсан ч зарим загварын онгоцонд техникийн асуудал тулгарсныг Цагаан ордны зүгээс дэлгээд байсан билээ.

Европ болон Барууны ихэнх орон ОХУ-ын эсрэг байр суурьтай болоод буй энэ үед Умард Солонгос тус улстай харилцаагаа чангатгахыг зорьж байна. Пёньяны эрх баригчид Украин дахь хурцадмал нөхцөл байдалд АНУ-ыг буруутгаж, Барууны “ноёрхлын бодлого” нь Орос улсыг өөрсдийгөө хамгаалахаас өөр аргагүй хүргэсэн гэж мэдэгдсэн.

Тэгвэл Умард Солонгосын тал Оросын эзэмшилд орсон газар нутгийг сэргээн босгоход туслахын тулд барилгын ажилчдыг илгээх сонирхолтой байгаагаа илэрхийлжээ. Мөн БНАСАУ-аас Москвад суугаа Элчин сайд саяхан Украины Донбасс дахь салан тусгаарлагчдын хоёр бүс нутгийн элч нартай уулзаж, “хөдөлмөрийн цагаачлалын салбарт” хамтран ажиллах талаар санал солилцсон байна.

Эх сурвалж: The Guardian