БНХАУ-д амьдарч, ажиллаж сурдаг иргэд, оюутнууд Бээжин болон бусад хотууд руу нисэх эрэлт их байна. Үүнтэй холбогдуулан “МИАТ” ТӨХК-ийн гүйцэтгэх захирал Б.Мөнхтамираас нислэгийн талаар тодрууллаа. 

“МИАТ” ТӨХК-ийн гүйцэтгэх захирал Б.Мөнхтамир:

-МИАТ компани Бээжин хот руу нислэг хийхгүй байгаа. Өнгөрсөн гурван жилийн хугацаанд дэлхий нийт цар тахалтай холбоотойгоор БНХАУ хилээ нээгээгүй.

Монголын ИНЕГ, БНХАУ-ын Иргэний нисэхийн Ерөнхий газар хоорондын хэлэлцээрээр дөрвөн долоо хоногтоо нэг удаа буюу сард нэг нислэг хийх зөвшөөрлийг БНХАУ-аас өгсөн. Ингэхдээ нэг онгоцны суудлын дүүргэлт 75 хувь байх, нислэг бүр дээрээс ковидын тохиолдол 10-аас доош байх зэрэг тодорхой заалт, шаардлагуудыг тавьсан. Мөн зорчигчид БНХАУ-д очоод 7+3 хоногийн тусгаарлалтад байх шаардлагатай.

МИАТ компани УБ-Бээжин, УБ-Гуонжоу чиглэлд нислэг үйлддэг ч БНХАУ-ын талаас тавьсан зөвшөөрлийн дагуу УБ-Гуонжоу чиглэлд л нисэж байгаа. Өнөөдрийн байдлаар УБ-Бээжин чиглэлд Монгол болон Хятадын ямар нэгэн агаарын тээвэрлэгч нисэж эхлээгүй байна.

УБ-Гуонжоу чиглэлд 7, 8-р сард нэг нэг удаа нислэг үйлдсэн бол энэ сард буюу есдүгээр сарын 6-нд нэг удаа нислэг үйлдэнэ. Эрэлт их байна. Тухайлбал, БНХАУ-д амьдардаг монгол иргэд, оюутнууд, цар тахлын үед Монголд гацсан хятадын иргэд бас байна. Нийтэд нээлттэй байх үүднээс www.miat.com хаяг дээр бүртгэж байгаа. Учир нь, УБ-Гуонжоу чиглэлд сардаа нэг удаа хийж байгаа нислэгээр нисэх иргэд www.miat.com руу орж, байнгын оршин суух зөвшөөрөл, ковидын шинжилгээ байгаа эсэх зэрэг БНХАУ-ын талаас тавьсан шаардлагыг бүрдүүлэх ёстой. 

Олон иргэд нисэх хүсэлтээ ирүүлж, хандаж байгаа ч бид хэн нэгнийг урдуур нь оруулах боломжгүй. Цэвэр системийн шийдлээр “хэн түрүүлж бүртгүүлсэн нь нис” гэдэг байр суурьтай байгаа гэлээ. 

---