Цар тахлын улмаас сүүлийн хоёр жил гаруйн турш хаагдаад байсан Филиппиний сургуулиуд өнөөдрөөс эргэн нээгдэж, сая сая хүүхэд буцаад танхимын сургалтад шилжиж байна.

Филиппин нь танхимын сургалтаа бүрэн сэргээсэн дэлхийн сүүлчийн улсуудын нэг бөгөөд сургуулиудыг удаан хугацаагаар хаасан нь тус улсын боловсролын хямралыг улам дордуулсан гэж мэргэжилтнүүд эмээж байна. Дэлхий даяар коронавирус дэгдэхээс өмнө ч гэсэн Филиппиний 10 хүүхэд тутмын ес нь 10 нас хүртлээ "энгийн текстийг уншиж ойлгох чадваргүй байдаг" гэж Дэлхийн банкнаас гаргасан тайланд дурджээ.

Тус улсын эрх баригчид өнөөг хүртэл телевиз, олон нийтийн сүлжээ, цахим хичээлийг хамарсан "холимог" сургалтын хөтөлбөрийг хэрэгжүүлж байсан билээ. Гэвч танхимын сургалтыг сэргээснээр хуучин асуудлууд ч мөн эргээд сэдрэх төлөвтэй байна. Ядуурал, ариун цэврийн өрөө зэрэг суурь дэд бүтцийн хомстол, хуучирсан заах арга зүй болон нэг ангид хэтэрхий олон сурагч байдаг нь Филиппиний боловсролын хямралд нөлөөлсөн аж.

Анги танхимуудыг дахин нээхтэй холбогдуулан тус улсын Засгийн газраас вакцинжуулалтын ажлыг эрчимжүүлж, сурагчдыг энэ жил дуустал нийтийн тээврээр үнэ төлбөргүй зорчуулахаар болжээ. Мөн сургуулийн зардлын асуудалтай тулгараад буй сурагч, эцэг эхчүүдэд мөнгөн тусламж тарааж эхэлснээр түгээлтийн төвүүдийн гадаа эмх замбараагүй байдал үүсэхэд хүргэсэн байна.

Эх сурвалж: AFP

---