Мал амьтны эрүүл мэндийн тухай хууль хэрэгжснээр мал эмнэлгийн салбарыг олон улсын жишигт нийцүүлэн бэхжүүлэх, малын эмч, мэргэжилтнүүдийг сургаж мэргэшүүлэх нэн тэргүүний зорилт болох билээ. 

Энэ хүрээнд Японы Олон улсын хамтын ажиллагааны байгууллага (ЖАЙКА)-ын Монгол дахь Төлөөлөгчийн газрын дарга Танака Шиничи болон ХАА, байгаль орчин, эрчим хүчний салбар хариуцсан мэргэжилтэн Накамура Кэйго нарыг Мал эмнэлгийн ерөнхий газар хүлээн авч уулзлаа.

Уулзалтаар “Төрийн болон хувийн хэвшлийн малын эмч нарын практик чадварыг дээшлүүлэх төсөл”-ийн үйл явцыг танилцуулж, цаашид хамтран ажиллах гэрээнд нэмэлт өөрчлөлт оруулах тухай саналыг солилцож, Мал эмнэлгийн ерөнхий газрын дарга Д.Батчулуун Монгол оронд шүлхийтэй тэмцэх чадавхыг сайжруулах талаар шинэ төсөл хэрэгжүүлэх талаар танилцуулсныг ЖАЙКА-ийн талаас дэмжиж, хамтран ажиллахаар тохиролцлоо.

---