БНАСАУ-д цар тахлын томоохон давлагаа дэгдэж, сая гаруй хүн халдвар авсан байж болзошгүй байна. Пёньяны зүгээс "халууралт" гэж нэрлээд буй халдварт өвчнөөр сая гаруй хүн өвчилсөн гэж тус улсын төрийн мэдлийн "KCNA" агентлаг мэдээлсэн юм.

Одоогийн байдлаар тус улсад цар тахлын улмаас 50 орчим хүн нас барсан ч эдгээр хүний хэд нь коронавирусийн шинжилгээ өгч, "Эерэг" гарсан нь тодорхойгүй байна. Умард Солонгосын шинжилгээний хүчин чадал бага тул батлагдсан тохиолдлын тоо цөөн байгаа билээ. Мөн тус улсын эрүүл мэндийн тогтолцоо муу, иргэд нь цар тахлын эсрэг вакцинжуулалтад хамрагдаагүй учир коронавирусийн халдварт өртөмтгий байх магадлалтай. 

Умард Солонгосын удирдагч Ким Жон Ун өнгөрсөн амралтын өдрүүдэд улс төрийн товчооны яаралтай хуралдааныг удирдаж, үндэсний эмийн нөөцийн хуваарилалтын асуудалд холбогдох албаны хүмүүсийг буруутгажээ. Ингээд тэрээр армийн эмнэлгийн корпусын "чадалтай хүчин"-д "Пёньян хотын эмийн хангамжийг нэн даруй тогтворжуулах"-ыг үүрэг болгосон юм.

Харин Өмнөд Солонгосын зүгээс тус улсад вакцин, эрүүл мэндийн ажилтнууд, эмнэлгийн тоног төхөөрөмж зэрэг хязгааргүй тусламж илгээхийг санал болгоод байна.

Эх сурвалж: BBC

---