БИЧЛЭГ: Т.Аюурсайхан: Төрийн банканд асуудал их байна

Хөгжлийн банкны тонуултай зэрэгцэн Төрийн банк тойрсон олон асуудал байгааг УИХ-ын гишүүн Т.Аюурсайхан өнгөрсөн долоо хоногийн Эдийн засгийн байнгын хороон дээр хөндлөө. 

Төрийн банкийг төрийн хувьчлах аж ахуйн нэгж, үйлдвэрийн газруудын жагсаалтаас хасаад удаж байгаа. Чухам яагаад хассан, одоо болтол яагаад хувьчлахгүй байгаа, төрийн мэдэлд байлгаж ялангуяа сонгуулийн үеэр тонох ажиллагаа явагдсаар байгаа юу гэдэг нь олны анхаарлын төвд байсаар байдаг. 

УИХ-ын гишүүн Т.Аюурсайхан Монголбанкны Ерөнхийлөгч Б.Лхагвасүрэнд хандан Төрийн банктай холбоотой асуулгыг бичгээр өгөхөд түүний өмнөөс тус банкны дэд ерөнхийлөгч Г.Энхтайван хариу өгсөнд тэрбээр бухимдлаа илэрхийллээ. 

УИХ-ын гишүүн Т.Аюурсайхан: 

-Төрийн албаны тухай хуульд зааснаар Монголбанкны ерөнхийлөгчид УИХ-ын гишүүн асуулга асууж хандсан бол ерөнхийлөгч өөрөө хариулт өгөх ёстой. Яагаад дэд ерөнхийлөгч нь өмнөөс нь өгөв? Энэ бол хуульд зааснаар хариуцлага хүлээх үндэслэл болно, нэгд.

Хоёрт, асуулгын хариуг өгөхдөө бүх хуудсанд нууцын тэмдэг тавьсан. Төрийн банкнаас шүүхээр шийдвэрлүүлэхээр хандсан мэдээлэл дотор, 78.8 тэрбум төгрөгийг шийдвэрлүүлсэн, одоо шүүх дээр 97.7 тэрбум төгрөгийн асуудал байгаа гэсэн байна. Мөн, 120 зээлдэгчийн 986 сая төгрөгийг Эрсдэлийн сангаас хассан гэсэн байна. Энэ бүхэн яагаад нууцын хамаарав? Яриулахгүй гэж байгаа юм уу? Энэ мэдээллүүд чинь банкны сайт дээр байгаа шүү дээ! Шүүхэд хандахаар мэдээлэл нь ил тод явж байгаа шүү дээ? Яагаад өмнөөс нь хариулт өгч хууль зөрчихдөө нууцын тэмдэг дарав? 

Монголбанкны дэд ерөнхийлөгч Г.Энхтайван: 

-Монголбанкны ерөнхийлөгч өнгөрсөн долоо хоногт ОУВС-ийн уулзалтанд явсан учир хуулийн хугацаанд багтаан миний бие өмнөөс нь гарын үсэг зурж илгээсэн. Гишүүний асуулгад хариулт өгөхийн тулд Төрийн банкнаас мэдээлэл хүссэн. Өгөхдөө зарим мэдээлэл дээр албаны нууцын тамга дарсан байсан учир Тагнуулын ерөнхий газрын зөвлөмжийн дагуу бүх хуудсан дээр нууцын тэмдэг дарсан. Дийлэнх нь мэдээлэл нь нууц биш, гэхдээ мэдээлэл нь холилдож орсон учир бүхэлд нь нууцын тэмдэг дарсан гэв.