Геронтологийн үндэсний төвийн барилгыг ашиглалтад оруулахад 13.8 тэрбум төгрөг шаардлагатай
Геронтологийн үндэсний төвийн 60 ортой барилга барихаар 2011 онд шав тавьсан ч өнөөдрийг хүртэл баригдаж дуусаагүй байгаа юм. Тэгвэл Геронтологийн үндэсний төвийн барилга, дэд бүтэц, хөрөнгө оруулалтын асуудлаар УИХ-ын гишүүн Б.Жаргалмаа, Ц.Идэрбат нар холбогдох талуудын албан тушаалтнуудтай уулзжээ.
Геронтологийн үндэсний төвийн барилгын шавыг Хан-Уул дүүргийн 10 дугаар хорооны нутаг дэвсгэрт 2011 онд тавьсан бөгөөд энэ хугацаанд зураг төсөл нь гурван удаа өөрчлөгдөж, төсөвт өртөг нь нэмэгджээ.
Хамгийн сүүлд 2019 онд зураг төслийг шинэчлэхэд төсөвт өртөг нь 17.3 тэрбум төгрөг болсон байна. Одоогийн байдлаар барилгын гүйцэтгэлийн явц 46 орчим хувьтай байгаа бөгөөд ашиглалтад оруулахад 13.8 тэрбум төгрөг шаардлагатай ч энэ санхүүжилтийг 2022 оны төсөвт тусгаагүй байна.
Ингэснээр барилгын захиалагч Эрүүл мэндийн яаманд барилгыг үргэлжлүүлэн барьж дуусгахад шаардагдах дүгнэлт, шинжилгээ хийх ажлыг Барилгын хөгжлийн төвтэй хамтран зохион байгуулах хугацаатай үүрэг өгөв.
Энэхүү барилгын гүйцэтгэгчээр “Арвис интернэйшнл” ХХК ажилласан бөгөөд тэд барилгын гүйцэтгэл зогссон шалтгаанаа дэд бүтцийг шийдэж өгөөгүйтэй холбоотой хэмээн тайлбарлаж байжээ.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.