2021 оны зургадугаар сарын 21-ний өдөр УИХ-ын гишүүн Д.Өнөрболор, П.Анужин, Х.Ганхуяг, Х.Булгантуяа нарын гишүүд УИХ-д өргөн мэдүүлсэн Хөрөнгө оруулалтын тухай хуульд өөрчлөлт оруулах тухай хуулийн төслөө татан авч байгаа талаар УИХ-ын дарга Г.Занданшатар мэдэгдлээ.

Тодруулбал, УИХ-ын гишүүн Д.Өнөрболор 2021 оны аравдугаар сарын 11-ний өдөр, П.Анужин 2021 оны аравдугаар сарын 12-ний өдөр Х.Ганхуяг, Х.Булгантуяа нар 2022 оны гуравдугаар сарын 22-ны өдөр УИХ-д албан бичиг ирүүлсэн байна.

УИХ-ын дарга Г.Занданшатар:

-Монгол Улсын Засгийн газраас 2022 онд үе шаттайгаар өргөн мэдүүлэх хуулийн төслийн жагсаалтад Хөрөнгө оруулалтын тухай хуулийн төслийн шинэчилсэн найруулгыг 2022 оны тавдугаар сард УИХ-д өргөн мэдүүлэхээр оруулсан ба 2022 оны хаврын ээлжит чуулганаар хэлэлцэхээр бэлтгэж байна. Цар тахлын дараах эдийн засгийг дэмжих зорилгоор 2021-2025 оны Хөрөнгө оруулалтын хөтөлбөрийг шинэчлэн батлах тухай УИХ-ын тогтоолын төслийг хэлэлцүүлэхэд бэлтгэж байгаа гэлээ.

Тус хуулийн төсөлд Монгол Улсад хөрөнгө оруулалт хийсэн гадаадын хөрөнгө оруулагч, түүний гэр бүлд Монгол Улсад зорчих олон удаагийн орж, гарах визийг холбогдох хууль тогтоомжийн дагуу олгохыг тусгасан байна. Мөн гадаадын хөрөнгө оруулагч, түүний гэр бүл Монгол Улсад хувийн хэргээр оршин суух хүсэлт гаргасан тохиолдолд 50 мянган ам.доллар буюу түүнтэй тэнцэх хэмжээний төгрөгөөс дээш хөрөнгийг Монгол Улсад хөрөнгө оруулалт хийснийг үндэслэн олгох зэрэг өөрчлөлтийг тусгасан байна.

---