"Visa" болон "Mastercard" ОХУ дахь үйл ажиллагаагаа зогсоожээ
"Visa", "Mastercard", "American Express" компаниуд Украин дахь Оросын түрэмгийллийг эсэргүүцэн, ОХУ дахь бүх үйл ажиллагаагаа зогсоох болсноо мэдэгджээ.
Гэвч энэхүү алхам нь хэрэглэгчдэд бага нөлөө үзүүлнэ гэж Оросын томоохон банкнууд онцлоод байгаа юм. Иргэд картынхаа хүчинтэй хугацааг дуустал ОХУ-ын нутаг дэвсгэрт худалдан авалт хийх боломжтой бөгөөд харин гадаадад нээсэн картууд нь ашиглах боломжгүй болох аж. Түүнчлэн ОХУ-ын картыг гадаадад ашиглах, эсвэл цахимаар олон улсын төлбөр хийхийг хориглох гэнэ.
"Visa" болон "Mastercard" нь дэлхийн кредит болон дебит төлбөрийн 90 орчим хувийг хянадаг ч үүнд БНХАУ хамаардаггүй билээ. Тэгвэл Оросын хэд хэдэн банк Хятадын "UnionPay" систем болон орон нутгийн "Мир" төлбөрийн сүлжээг ашигладаг картуудыг хэрэглээнд гаргахыг санал болгосон байна.
Украин дахь мөргөлдөөн эхэлснээс хойш "Visa", "Mastercard" компаниуд Барууны орнуудын тавьсан хориг арга хэмжээг дагаж мөрдөхөө зарлаад байсан бөгөөд "Энэ дайн бидний энх тайван, тогтвортой байдалд аюул заналхийлж буй тул бид өөрсдийн үнэт зүйлсийн дагуу хариу арга хэмжээ авах ёстой" хэмээн "Visa"-ийн тэргүүн Аль Келли тэмдэглэжээ. Харин "American Express" компани ОХУ-ын Украин дахь довтолгоо нь "үндэслэлгүй зүйл" гэж нэрлээд, Беларусь дахь бүх бизнесийн үйл ажиллагаагаа мөн зогсоосон юм.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.