Өмнөд Солонгосын Ерөнхийлөгчийн сонгуулийн урьдчилсан санал хураалт өнөөдөр өглөөнөөс тус улс даяарх нийт 3,552 санал авах байранд эхэлжээ.

Санал авах байрууд өнөөдөр болон маргаашийн 06:00-18:00 цагийн хооронд ажиллах бөгөөд ирэх долоо хоногийн лхагва гарагт болох сонгуулийн өдрөөс өмнө саналаа өгөхийг хүссэн хэн ч очих боломжтой аж. Мөн коронавирусээр өвчилсөн иргэд болон тусгаарлалтад байгаа хүмүүс бямба гаргийн 17:00-18:00 цагийн хооронд ирж, саналаа өгөх хэрэгтэй гэжээ.

Ерөнхийлөгчийн сонгуульд эрх баригч намаас нэр дэвшигч И Жэ Мёнг, сөрөг хүчний гол нэр дэвшигч Юн Сог Ёл болон Шударга ёс намаас нэр дэвшигч Сим Санг-жонг нар өнөөдөр өглөө эрт саналаа өгцгөөсөн юм.

БНСУ-ын энэ жилийн Ерөнхийлөгчийн сонгууль мөн тус улсын Парламентын таван мандатын нөхөн сонгуультай зэрэгцэн явагдах байгаа билээ.

Эх сурвалж: Yonhap News Agency

---