Д.Сумъяабазар: Хотын түгжрэл 3-4 хавханд орчихлоо

Анхнаасаа зөв тооцоогүй төлөвлөлт өнөөдөр нийслэлийн зам харилцаа, зорчих урсгалыг хавханд оруулчихлаа хэмээн НЗД бөгөөд Улаанбаатар хотын захирагч Д.Сумъяабазар цахим хуудастаа бичжээ.

Тэрбээр "Гурав, дөрвөн том хавханд нийслэлчүүд бид байна. Өнөөдөр нийслэлд бүртгэлтэй байгаа 650 мянган машин бүгдээрээ хотын хөдөлгөөнд орвол нийслэлийн зам шууд зогсоно. Тэг зогсолт болно. Тэгэхээр шийдэмгий, хатуу шийдвэрүүд гаргах цаг болсон.

Нэгдүгээрт, импортоор орж ирж байгаа насжилт өндөртэй, он хуучин, цаад газраа аваар осолд орсон, буруу рультэй зэрэг тээврийн хэрэгслүүдэд импортын хязгаарлалт тогтооно. Цаад газраа төмрийн хог руу ачигдахад бэлэн болсон автомашинуудыг манайхан засаж, янзлаад эх орондоо зарж байгаа. Үүнийг хориглоно.

Импортоор орж ирж байгаа буруу рультэй тээврийн хэрэгслийг 2022 оны наймдугаар сараас юм уу 2023 оны нэгдүгээр сараас хориглох шийдвэр гарна. Хамгийн түрүүнд авах ёстой арга хэмжээ энэ. Гэхдээ одоо ороод ирчихсэн машинуудад хугацаа өгнө. 2025 он юм уу 2026 он хүртэл. Харин хөдөө орон нутагт бол хязгаар хориг байхгүй, явж байгаад тэгээд дуусах биз.

Зөвхөн нийслэлд нэг жилд 80 мянган тээврийн хэрэгсэл нэмэгдэж байна. Тэдгээрийн дийлэнх нь стандартын шаардлага хангахгүй, эвдэрхий, өмнө нь аваар осолд орж байсан, үйлдвэрлэгдэхээ больсон автомашинууд байгааг хүмүүс мэддэг, судалгаагаар ч тогтоогдсон" гэжээ.