Украин улсын хэд хэдэн банк, Засгийн газрын агентлагийн вэбсайтууд өнгөрөгч лхагва гарагт кибер халдлагад өртөж, ажиллагаагүй болсон байна.

Тус өргөн хүрээний халдлага нь өдрийн туршид эрчимжсэн бөгөөд "урьд өмнө нь байгаагүй түвшинд" бүртгэгдсэн гэж тус улсын Засгийн газраас мэдэгджээ. Украины Дижитал өөрчлөлтийн сайд Михайло Федоров "Манай улс руу чиглэсэн цогц "DDoS" халдлага дахин эхэллээ" хэмээн олон нийтийн сүлжээндээ бичсэн юм.

Энэ удаагийн халдлагын дараа тус улсын цэргийн болон банкны вэбсайтууд өмнөх тохиолдлуудаас илүү хурдан сэргэсэн бөгөөд энэ нь өндөржүүлсэн бэлэн байдал, хариу арга хэмжээ авах хүчин чадлаа нэмэгдүүлсэнтэй холбоотой болохыг мэргэжилтнүүд онцолж байна. Гэсэн хэдий ч нөхцөл байдал ноцтой хэвээр байгаа ба Украйны Аюулгүй байдлын албанд саатал, тасалдал үргэлжилсээр байгаа аж.

Өнгөрсөн долоо хоногт үүнтэй төстэй халдлага болж, тус улсын цөөн тооны вэбсайтад нэвтрэх боломжгүй болсон билээ. Тухайн үед Их Британи, АНУ-ын кибер албаныхан Кремлийн шууд тушаалаар хөдөлж буй Оросын хакеруудыг буруутай гэж мэдэгдсэн юм. Өргөн цар хүрээнд үргэлжилж буй цахим халдлагын улмаас Украин улс олон улсаас тусламж хүссэн бөгөөд Европын Холбоо кибер аюулгүй байдлын багуудаа тус бүс даяар байрлуулж байна.

Эх сурвалж: BBC

---