В.Путин: "Аюулгүй байдлын талаар тохиролцох боломжгүй"

ОХУ-ын ашиг сонирхол, аюулгүй байдлын талаар харилцан тохиролцох боломжгүй гэж Ерөнхийлөгч Владимир Путин иргэддээ хандан мэдэгджээ.

АНУ-ын Ерөнхийлөгч Жо Байден Оросын эсрэг цогц хориг арга хэмжээг танилцуулснаас хойш хэдэн цагийн дараа Путин цахим мэдэгдэл хийж, "ОХУ шулуун, шударга яриа хэлэлцээрт үргэлж нээлттэй байсан ч цэрэг армидаа бүрэн итгэлтэй байгаа" хэмээн онцолсон байна.

Ерөнхийлөгч Путин дипломат харилцаанд нээлттэй хэвээр гэж мэдэгдсэн ч Францын Гадаад хэргийн сайд, АНУ-ын Төрийн нарийн бичгийн дарга Энтони Блинкен нар Оросын Гадаад хэргийн сайд Сергей Лавровтой уулзах төлөвлөгөөгөө цуцлаад байгаа юм.

Түүнчлэн Украйны Ерөнхийлөгч Владимир Зеленский ОХУ-тай дипломат харилцаагаа бүрмөсөн тасалж магадгүй гэж мэдэгдсэн билээ. Тус улсын Гадаад хэргийн яам мөн иргэдээ Оросоос гарахыг уриалж, хурцадмал нөхцөл байдлын улмаас консулын тусламж хязгаарлагдаж болзошгүйг анхааруулсан байна.

Эх сурвалж: BBC