ОХУ Украйнд халдсан тохиолдолд Япон улс Оросын эсрэг хориг арга хэмжээ авахад бэлэн бөгөөд ингэхдээ АНУ болон "Их Долоо" бүлгийн бусад орны жишгийг дагана гэж мэдэгджээ.

Ерөнхий сайд Фумио Кишида энэ талаар мэдэгдэхдээ Ерөнхийлөгч Владимир Путины үйлдлийг "хүлээн зөвшөөрөх боломжгүй бөгөөд олон улсын хуулийг зөрчсөн явдал" гэж тодорхойлоод, Японы зүгээс хатуу хариу арга хэмжээ авахад бэлэн байгааг онцлон тэмдэглэсэн байна.

Тус улс нь хориг арга хэмжээнийхээ хүрээнд, хагас дамжуулагч чип болон технологийн бусад экспортоо зогсоож, Оросын банкнуудад тавих хязгаарлалтаа чангатгана гэж орон нутгийн хэвлэлүүд таамаглаж байгаа юм.

Японы Засгийн газар өнгөрсөн хугацаанд ОХУ-тай харьцангуй дипломат арга барилаар харьцдаг байсан хэдий ч сүүлийн үед хатуу байр суурь баримтлах болсон байна. Орос улс нь Японыг эрчим хүчний нүүрс болон шингэрүүлсэн байгалийн хийгээр хангадаг учир талууд эдийн засгийн нягт холбоотой билээ. Гэвч Зүүн Ази дахь Оросын цэргийн үйл ажиллагаа сэргэж, Москва хөрш Хятадтай аюулгүй байдлын хамтын ажиллагаагаа гүнзгийрүүлэх болсонд Японы эрх баригчид ихэд санаа зовниж байгаа юм.

Эх сурвалж: Reuters

---