В.Путин: ОХУ дайныг хүсэхгүй байна

ОХУ "мэдээж" Европт дайн хийхийг хүсэхгүй байгаа гэж Ерөнхийлөгч Владимир Путин өнгөрөгч мягмар гарагт мэдэгджээ. Гэхдээ Оросын аюулгүй байдлын асуудалд анхаарч, нухацтай авч үзэх ёстой гэдгийг тэрээр онцолсон юм.

Ерөнхийлөгч Путин Германы канцлер Олаф Шольцтой дөрвөн цагийн турш хэлэлцсэний эцэст сэтгүүлч нарын асуултад хариулахдаа "Бид дайныг хүсэж байна уу гэж үү? Мэдээж үгүй. Тийм учраас бид хэлэлцээрийн явцын төлөө санал дэвшүүлж байгаа" хэмээн тэмдэглэсэн байна. Харин ноён Шольц ОХУ Украйны хил дагуу цэргээ бүрдүүлсэн нь "ойлгомжгүй" алхам хэдий ч хурцадмал байдлыг дипломат арга замаар намжаах боломжтой гэж мэдээлсэн юм.

Гэхдээ Путин Европт дайны жишиг бий гэдгийг онцлон, 1990-ээд оны хуучин Югослав дахь мөргөлдөөнийг жишээ болгосон бөгөөд Сербийн эсрэг тус ажиллагааг НАТО НҮБ-ын Аюулгүйн Зөвлөлийн зөвшөөрөлгүйгээр гүйцэтгэсэн гэж хэлжээ. Үүний хариуд канцлер Шольц сербүүд бусад үндэстний эсрэг геноцид хийх аюул нүүрлэсэн тул нөхцөл байдал өөр байсан гэж тэмдэглэсэн ч Ерөнхийлөгч Путин Украйны зүүн хэсгийн Донбасс бүс нутагт үүсээд буй нөхцөл байдлыг мөн адил оросуудын эсрэг геноцид гэж нэрлэсэн байна.

Энэхүү уулзалтаас өмнө Оросын арми Украйны хил орчмын зарим цэргээ татаж байгаагаа мэдэгдсэн нь хурцадмал байдал намжиж болзошгүйг харуулсан анхны дохио болсон юм. Гэхдээ ОХУ цэргээ татсан гэх нотлох баримт одоог хүртэл байхгүй байгааг Барууны удирдагчид хэлсэн байна.

Эх сурвалж: BBC