Хондурасын Ерөнхийлөгч асныг хар тамхины хэргээр баривчилжээ
Хондурасын Ерөнхийлөгч асан Хуан Орландо Эрнандес хар тамхины хэргээр өнгөрөгч мягмар гарагт баривчлагджээ. Тэрээр 2014 оноос энэ оны 1 дүгээр сар хүртэл Хондурасыг удирдаж байсан юм.
АНУ-ын Төрийн департамент өнгөрсөн долоо хоногт ноён Эрнандесийг авлигын хэрэгт холбоотой гэж үзэн, тус улсад нэвтрэхийг хориглосон хүмүүсийн жагсаалтад нэмсэн байна. Тус улсын зүгээс мөн Ерөнхийлөгч асныг хар тамхины хэргээр шилжүүлэн өгөх хүсэлтийг энэ сарын 14-ний өдөр гаргасан бөгөөд үүнээс хэдхэн цагийн дараа Хондурасын цагдаа нар Эрнандесийг нийслэл Тегусигальпа дахь гэрээс нь баривчилсан байна.
Хэдий тэрээр аливаа эсэргүүцэл үзүүлэхгүйгээр баривчлагдсан ч түүнийг буруутгаж буй бүх хэргийг үгүйсгэж байгаа юм.
Хуан Орландо Эрнандесийн дүү Тони Эрнандес хар тамхины гэмт хэргийн бүлэглэлийн гишүүн байсан бөгөөд тэрээр өнгөрсөн жил АНУ-д бүх насаараа хоригдох ял сонссон аж. Тэгвэл прокурорууд Ерөнхийлөгч асныг мөн тус бүлэглэлтэй холбоотой гэж үзэж байгаа бөгөөд Мексикийн хар тамхины наймааны хаан гэгддэг "Эль Чапо"-гоос нэг сая ам.долларын авлига авсан гэж таамаглаж байна.
Хондурас нь сүүлийн жилүүдэд Өмнөд Америкаас АНУ руу хар тамхи зөөвөрлөх гол дамжин өнгөрөх цэг болоод байгаа билээ. Эрнандес хар тамхины наймаатай тэмцэхийн тулд чадах бүхнээ хийсэн гэж мэдэгдсээр ирсэн бөгөөд Ерөнхийлөгч Дональд Трампын засаглалын үед АНУ-ын Засгийн газрын дэмжлэгийг авдаг байсан. Гэвч Ерөнхийлөгч Жо Байден сонгогдсоноос хойш АНУ болон түүний харилцаа муудсан юм.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.