Өнөөдрөөс эхлэн Монгол Улс цар тахлын үеийн улбар шар түвшнээс шар түвшинд шилжиж байна.

Монгол Улсын Засгийн газрын ээлжит бус хуралдаан болж гарсан шийдвэрийг Ерөнхий сайд Л.Оюун-Эрдэнэ танилцууллаа. 

Тэрбээр "Өнөөдөр Монгол Улсын Засгийн газар хуралдаж, цар тахлын Улбар шар түвшинг Шар түвшинд шилжүүлж, гамшгаас хамгаалах өндөржүүлсэн бэлэн байдлыг цуцлах тухай Засгийн газрын тогтоолыг баталлаа. Коронавируст халдварын цар тахалтай тэмцэх, эрсдэлийг бууруулах зорилгоор улсын хэмжээнд засаг захиргаа, нутаг дэвсгэрийн нэгж, төрийн болон нутгийн захиргааны байгууллага, хуулийн этгээдийг гамшгаас хамгаалах өндөржүүлсэн бэлэн байдлын зэрэгт шилжүүлсэн хугацааг 2022 оны хоёрдугаар сарын 14-ний өдрөөс цуцаллаа. Халдварын тархалт, хүн амын вакцинд хамрагдсан байдал, Эрүүл мэндийн яам, Улсын онцгой комиссын хуралдаанаас гаргасан шийдвэр зэргийг үндэслэн ийнхүү шийдвэрлэлээ.

Монгол Улс 2020.11.12-ны өдрөөс эхлэн хоёр жилийн хугацаанд 7 удаагийн хөл хорио тогтоож, улбар шар түвшин буюу гамшгаас хамгаалах өндөржүүлсэн бэлэн байдалд байлаа. Энэ үед экспорт хумигдаж, үйлчилгээний газрууд үүд хаалгаа барьж, 200 гаруй мянган ажлын байр хүнд байдалд орж, улсын төсвийн орлого 23 хувиар тасарч, 1990 оноос хойш анх удаа ДНБ -5,3 хувьд хүрсэн. Цар тахал дэлхийн II дайнаас хойш тулгараагүй хүнд бэрхшээлд хүн төрлөхтнийг оруулсан.

Засгийн газар "Эрүүл мэнд-Эдийн засаг" хоёр тусдаа асуудал биш харилцан уялдаатай асуудал гэдгийг тодорхойлж ажиллалаа. Өнгөрсөн хугацаанд Засгийн газартай хамтран ажилласан нийт иргэд, ААНБ-даа гүн талархал илэрхийлье. 

Вакцины бүрэн тунд хамрагдсан зорилтот бүлгийн 92 хувь, нэмэлт III тунд зорилтот бүлгийн 52 хувь, дөрөвдүгээр тунд өнөөдрийн байдлаар 90 орчим мянган хүн идэвхитэй хамрагдсан тул халдвар хамгааллын эрсдэлийн үнэлгээнд тулгуурлаж, Монгол Улс олон улсын зорчих хөдөлгөөнд бүрэн нээллттэй улс болсноо өнөөдөр ийнхүү зарлаж байна.

Иргэн Та амны хаалтаа зүүж, зайгаа барьж, гараа ариутгаж, вакциндаа идэвхтэй хамрагдах зөвлөмжөөс бусад цар тахлын үеийн бүхий л хязгаарлалтууд өнөөдөр цуцлагдаж байна.

Гаднаас ирэх жуулчин вакциндаа бүрэн хамрагдсан бол хүлээж авахад бэлэн. Вакциндаа хамрагдаж амжаагүй бол Монгол Улс вакцинжуулахад бэлэн байна. Монгол Улсын төр захиргааны байгууллагууд, хувийн хэвшил, аялал жуулчлалын компаниуд Та бүхний аюулгүй байдлыг хангаж, хүндрэл бэрхшээлгүй шуурхай үйлчилгээ үзүүлж, Монгол Улсад ажил төрлийн болон аялал жуулчлалын зорилгоор саадгүй хүрэлцэн ирэх бүхий л бололцоог хангахын төлөө хичээнгүйлэн ажиллах болно гэдгийг Монгол Улсын Ерөнхий сайдын хувьд илэрхийлж байна." гэлээ. 

Харин хилийн боомт орчимд коронавирус халдварын тархалт нэмэгдэж, экспорт, импортын үйл ажиллагаа тасалдахаас урьдчилан сэргийлэх зорилгоор Алтанбулаг, Булган, Боршоо, Гашуунсухайт, Замын-үүд, Сүхбаатар, Ханги, Шивээхүрэн, Цагааннуур, Эрээнцав хилийн боомт байрлаж буй бүсэд гамшгаас хамгаалах өндөржүүлсэн бэлэн байдлын зэрэг тогтоож, халдварын тархалтаас урьдчилан сэргийлэх арга хэмжээ авч хэрэгжүүлэхийг Баян-Өлгий, Дорноговь, Дорнод, Өмнөговь, Сүхбаатар, Сэлэнгэ, Увс, Ховд аймгийн Засаг дарга нарт тус хуралдаанаас үүрэг болголоо.

---