Камила Валиевагийн допингийн шинжилгээнээс хориотой эм илэрчээ

"Бээжин-2022" өвлийн олимпын наадамд оролцож буй ОХУ-ын уран гулгагч Камила Валиевагийн допингийн шинжилгээнээс хориотой эм илэрсэн болохыг тус улсын хэвлэлүүд мэдээлж байна.

Энэхүү хориотой эм нь Триметазидин гэх зүрхний цусны урсгалыг нэмэгдүүлж, цусны даралтын огцом хэлбэлзлийг хязгаарладаг эм бөгөөд цээжний өвдөлтийг намдаахад ашигладаг аж. Уг эмийг АНУ-д хэрэглэхийг зөвшөөрдөггүй ба Дэлхийн сэргээшний эсрэг агентлагийн хориотой бодисын жагсаалтад 2014 онд багтжээ.

Валиева нь өнгөрөгч даваа гарагт болсон Уран гулгалтын багийн төрөлд Оросын олимпын хорооны бүрэлдэхүүний хамт алтан медаль хүртсэн хэдий ч медаль гардуулах ёслолыг тодорхойгүй шалтгаанаар хойшлуулаад байсан юм. Тэгвэл Олон улсын олимпын хорооноос энэхүү допингийн шинжилгээний улмаас ийм алхам хийсэн гэж мэргэжилтнүүд таамаглаж байна. Дэлхийн сэргээшний эсрэг агентлагийн дүрэмд заасны дагуу допингийн зөрчил гаргасан тамирчдыг олон нийтэд зарлах ёстой ч хэрэв холбогдох хүн нь 18 нас хүрээгүй бол энэ нь шаардлагагүй аж. Харин Камила Валиева дөнгөж 15 настай билээ. 

Тэрээр Олимпын тэмцээнд дөрвөлсөн үсрэлт гүйцэтгэсэн анхны эмэгтэй тамирчин болж, ихээхэн шуугиан тариад байсан хэдий ч өнгөрөгч лхагва гарагт болсон бэлтгэлдээ оролцоогүй юм.

Оросын алдарт сэтгүүлч Василий Конов энэ талаар "Триметазидин гэх эм нь тамирчинд ямар ч байдлаар тус болохгүй. Мөн энэ нь өнгөрсөн оны 12 дугаар сард авсан нэг л сорьцоос илэрсэн. Маш бага хэмжээгээр. Түүний өөр дээжүүдээс дахих огт илрээгүй. Хүмүүсийн бодож байгаа шиг допинг биш гэсэн үг. Энэ зүрхний эм тамирчны гүйцэтгэлд ямар ч нөлөө үзүүлэхгүй. Одоо Камилаг тайван орхи" хэмээн олон нийтийн сүлжээндээ бичжээ.

ОХУ-ын өмнөх допингийн асуудлуудын улмаас одоо тус улсын тамирчид Оросын олимпын хороо гэх нэрийн дор туг далбаа, төрийн дуулалгүйгээр оролцож байгаа билээ. Оросын эрх баригчид допингийн эсрэг дүрмийг хэрэгжүүлэхэд зарим дутагдалтай тал байгааг хүлээн зөвшөөрсөн ч төрийн дэмжлэгтэй сэргээшний хөтөлбөр хэрэгжүүлдэг гэх мэдээллийг эрс үгүйсгэсэн юм.

Эх сурвалж: Reuters