Америк эрэгтэйд гахайн зүрх шилжүүлэн суулгажээ

АНУ-ын иргэн Дэвид Беннетт гений өөрчлөлттэй гахайны зүрхийг шилжүүлэн суулгуулсан дэлхийн анхны хүн болжээ.

Мэрилэндийн их сургуулийн Анагаах ухааны төвийн эмч нар эрхтэн шилжүүлэн суулгах энэхүү хагалгааг долоон цагийн турш гүйцэтгэсэн бөгөөд мэс заслаас хойш гурав хоногийн дараа ноён Беннеттийн биеийн байдал сайн байгаа аж. Гахайн зүрхийг шилжүүлэн суулгах нь уг өвчтөний амийг аврах сүүлчийн найдвар байсан ч хэр урт хугацаанд үр дүнтэй байхыг нь хэн ч мэдэхгүй юм.

Мэс заслыг хийсэн мэргэжилтнүүд АНУ-ын эмнэлгийн зохицуулагч байгууллагаас тусгай зөвшөөрөл авч, хагалгааг үйлджээ. Үүнээс өмнө, тэд олон жилийн турш судалгаа хийсэн бөгөөд энэ удаагийн амжилт нь дэлхий даяарх хүмүүсийн амьдралыг өөрчилж чадна гэж үзэж байна. Ахлах мэс засалч Бартли П.Гриффит энэ талаар "Энэхүү мэс засал нь дэлхийн эрхтэн хомстлын хямралыг шийдвэрлэхэд нэг алхам ойртуулна" хэмээн тэмдэглэжээ.

Жишээлбэл, АНУ-д өдөрт 17 өвчтөн донор хүлээж байхдаа нас бардаг бөгөөд нийт 100 мянга гаруй хүн хүлээлтийн жагсаалтад байдаг аж. Энэхүү хомстлын асуудлыг шийдэхээр амьтны эд эрхтнийг ашиглах боломжийг эрдэмтэд эртнээс судалж байгаа билээ.

Энэ удаагийн мэс засалд ашигласан гахайг генетикийн хувьд өөрчлөхдөө хүний ​​​​дархлалын хариу урвалыг өдөөдөг сахар үүсгэгч генийг нь устгасан байна.

Эх сурвалж: BBC