Хөл хорионд орсон хятад иргэд эд хогшлоо хүнсээр сольж байна

БНХАУ-ын Шиань хотод коронавирусийн тархалтын улмаас хатуу хөл хорио тогтоосноос хойш хоол хүнсний хомстол үүсээд байгаа бөгөөд зарим оршин суугч эд хогшил, технологийн хэрэгслээ хүнсний бүтээгдэхүүнээр сольж авахаас өөр аргагүйд хүрчээ.

Тус хотын 13 сая орчим хүн өнгөрсөн оны 12 дугаар сарын 23-наас хойш хөл хорионд орсон бөгөөд одоог хүртэл хоол хүнс худалдаж авахаар гэрээсээ гарч чадахгүй байгаа юм. Бүс нутгийн эрх баригчид айл өрхүүдийг үнэ төлбөргүй хоол хүнсээр хангаж байгаа ч зарим оршин суугчийн хувьд энэ нь хангалтгүй бөгөөд огт хангамж авч амжаагүй өрхүүд ч байгаа аж.

Тэгвэл сүүлийн өдрүүдэд, иргэд хувийн эд хогшлоо солилцон, хоол хүнсээ хангаж буй зураг, бичлэгээ олон нийтийн сүлжээнд ихээр байршуулах болжээ. Нэг хүн хайрцаг тамхийг байцаагаар сольсон бол өөр нэг хүн аяга таваг угаагч шингэнийг алимаар сольсон байна. Түүнчлэн нэгэн эрэгтэй "Nintendo Switch" тоглоомын консолоо боодол бэлэн гоймон болон хоёр мантуун буузаар сольсон гэнэ.

Хотын оршин суугч Ван "Хүмүүс идэх хоолгүй болсон тул байрныхаа хөршүүдтэй эд зүйлээ солилцож байгаа" гэж "Radio Free Asia" агентлагт ярьжээ. Тус агентлагийн мэдээлснээр, нэгэн оршин суугч ухаалаг утас болон таблетаа будаагаар солихоор төлөвлөж байгаа аж.

Одоогийн байдлаар Хятадын цар тахлын халдварын голомт болоод байгаа Шиань хотод албаныхан чанга хатуу арга хэмжээ авч байгаа бөгөөд энэ нь орон нутгийн иргэдийн зүгээс ихээхэн шүүмжлэл дагуулж байгаа билээ. Гэвч тус улсын Засгийн газар ирэх сард Бээжин хотноо болох Өвлийн олимпын наадмаас өмнө нөхцөл байдлыг хяналтдаа оруулж чадна гэж найдаж байна.

Эх сурвалж: BBC