Хаитигийн Ерөнхий сайдыг хөнөөх гэж оролджээ

Зэвсэгт этгээдүүд Хаити улсын Ерөнхий сайд Ариэль Хенригийн амийг хөнөөх гэж завдсан талаар албаныхан мэдэгджээ. Өнгөрөгч бямба гарагт болсон энэ хэргийн үеэр ноён Хенри Тусгаар тогтнолын ойн арга хэмжээнд оролцож байсан аж.

Хойд нутгийн Гонайвес хотын нэгэн сүмд болсон ёслолын үеэр зэвсэгт этгээдүүд халдлага үйлдсэн бөгөөд Ерөнхий сайд болон түүнийг дагалдаж явсан хүмүүс сумнаас бултан, автомашин руугаа зугтсан гэж гэрчүүд ярьсан байна. Гэмт хэрэгтнүүд халдлага үйлдэхээсээ өмнө номлогчийг заналхийлж, сүмийн хананы цаана нуугдаж байсныг албаны эх сурвалж мэдүүлсэн юм.

Улмаар халдагчид болон аюулгүй байдлын хүчнийхний хооронд болсон буудалцааны улмаас нэг хүн амиа алдаж, хоёр хүн шархадсан байна. Ерөнхий сайдын амь насанд хүрэх гэсэн оролдлогын ард "дээрэмчид болон алан хядагчид" байсан бөгөөд сэжигтнүүдийг баривчлах тушаал гаргасан гэж түүний ажлын албанаас мэдээлжээ.

Хаитигийн Ерөнхийлөгч Жовенел Моисе өнгөрсөн оны 7 дугаар сард алагдсаны дараа тус улсын аюулгүй байдлын нөхцөл байдал эрс муудаад байгаа билээ. Ерөнхийлөгчийн үхлээс хойш хоёр долоо хоногийн дараа Хаитигийн төрийн тэргүүний үүрэг гүйцэтгэгч болсон Ариэль Хенри орон нутгийн хүчирхэг гэмт бүлэглэлүүдийг таслан зогсоохоо амласан юм.

Эх сурвалж: BBC