Хүмүүс коронавирусийн эсрэг хамгаалалтаа хадгалахын тулд жил бүр вакцины 2-3 тунд хамрагдах шаардлагатай болно гэж Австралийн эрдэмтэд үзэж байна.

Куртин их сургуулийн Олон улсын эрүүл мэндийн профессор Жая Дантас "Вакцины үр нөлөөг бүрэн ойлгоход эрт байгаа хэдий ч нэмэлт тунг тогтмол тариулах шаардлагатай байж магадгүй. Тодруулбал, нэмэлт тунг жилд 2-3 удаа тариулах бөгөөд ялангуяа өндөр настнуудыг гурван тунд хамруулах хэрэгтэй" хэмээн тэмдэглэжээ.

Одоогийн байдлаар Австралийн хоёр сая гаруй иргэн нэмэлт тун тариулаад байгаа нь нийт хүн амын 8.3 хувь нь билээ. Тус улсын Засгийн газраас нэмэлт тунд хамрагдах хоорондын хугацааг таваас гурван сар болгон бууруулсан бөгөөд ингэснээр ирэх долоо хоногоос олон сая хүн гурав дахь тунгаа тариулж эхлэх юм.

Харин Израиль улсад хоёр дахь нэмэлт тунг аль хэдийн тарьж эхлээд байгаа бөгөөд АНУ-д ч мөн эмнэлгийн ажилтнуудыг адил дархлаажуулалтын хөтөлбөрт хамруулахаар төлөвлөж байгаа аж.

Эх сурвалж: The Guardian

---