Н.Түвшинбаярыг хохирогчийн ар гэрийнхний хүсэлтээр цагдан хорилоо

Хөдөлмөрийн баатар, олимпын аварга Н.Түвшинбаярыг цагдан хорих захирамж Хан-Уул дүүргийн Эрүүгийн хэргийн анхан шатны шүүхээс өчигдөр орой гаргалаа. Хохирогч улсын начин Э.Энхбатын ар гэрийнхэн шүүх, прокурорын байгууллагад хүсэлт гаргасан байна.

Зөвхөн хохирогчийн ар гэрийнхний хүсэлтээс гадна Хан-Уул дүүргийн Прокурорын газраас ч Н.Түвшинбаярыг хэргийг шүүхээр шийдвэрлэтэл цагдан хориулах санал хүргүүлсэн аж. Эдгээр санал, хүсэлтийг шүүгч харгалзан үзээд түүнийг цагдан хорихоор шийдвэрлэсэн гэнэ.
Түүнд холбогдох хэргийн урьдчилсан хэлэлцүүлэг дээрх шүүхэд маргааш болохоор товлоод байгаа бөгөөд эл хурлаар яллагдагч Н.Түвшинбаярыг шүүхэд шилжүүлэн гэм буруутай, эсэхийг нь дэнслэх боломжтой, үгүйг шийдвэрлэх юм. Уг хурлыг хохирогч болон шүүгдэгчийн өмгөөлөгч нараас гаргасан хүсэлтийн дагуу хийхээр болоод байгаа билээ.
Н.Түвшинбаярт Хан-Уул дүүргийн Прокурорын газраас Эрүүгийн хуулийн 11.1-2 дахь хэсэгт заасан хүний биед санаатай хохирол учруулах гэмт хэргийг бие махбодын зовуурь үүсгэж, зэвсгийн чанартай зүйл ашиглан үйлдсэн гэх үндэслэлээр яллах дүгнэлт үйлдээд буй юм.
Н.Түвшинбаярт зодуулан хүнд гэмтсэн Э.Энхбатыг өдгөө “Сонгдо” эмнэлэгт хэвтүүлэн эмчилгээ эхлүүлээд байгаа бөгөөд эхнэр нь олон нийтийн сүлжээн дэх хуудсандаа “Донор болдoг бол тал тархиа ч болов өгөх юмсан. Өнгөрсөн найман сарыг яаж тэвчиж, нулимсаа залгиж өнөөдрийг хүргэлээ. Зөв хүн байгаад хохирдог хорвоо юм. Миний хань тэмцсээр. Бид итгэлээ алдахгүй эцсээ хүртэл зүтгэх болно” хэмээн өчигдөр бичсэн байв.