Монголын циркийн урлагийн гайхамшгийг орчин үеийн тайзны урлагтай хослуулсан Nomade шоу тоглолт Бүгд Найрамдах Франц Улсад хоёр дахь удаагаа амжилттай тоглолоо.
Энэхүү тоглолтыг Монголын орчин үеийн циркийн “Angels” байгууллагын захирал, найруулагч, Соёлын тэргүүний ажилтан Б.Оргилболд дэлхийд алдартай Францын “Cirque Phénix”-тэй хамтран найруулсан бөгөөд 2019 оны 11 дүгээр сарын 23-наас 2020 оны 1 дүгээр сарын 19-ний өдрүүдэд Парис хотноо анх удаа тоглож үзэгчдийн талархлыг ихэд хүртэж байсан юм.
Харин цар тахлын дараагаар соёл урлагийн арга хэмжээ сэргэж эхлэхэд “Cirque Phénix” -ийн удирдлагаас ANGELS Mongolian Modern Circus Theatre циркийн хамт олонд дахин санал тавьснаар 2021 оны 12 дугаар сарын 11-21-ний өдрүүдэд Парисаас холгүй орших “Dammarie Les Lys” хот, мөн Францын баруун хойд нутагт байрлах Rennes хотод “Nomade” тоглолтоо амжилттай тоглоод өндөрлөж байна.

Монголын нүүдлийн ахуй соёл, зан заншил, өв уламжлалыг шингээсэн баялаг хөтөлбөртэй энэхүү тоглолтын уран сайхны удирдаачаар Монгол Улсын Гавъяат жүжигчин, Монголын Уран нугаралтын холбооны тэргүүн Л.Энхцэцэг ажиллаж, Хаанбанкны дэргэдэх Angels Mongolian Modern Circus & Theatre” цирк, Ulaanbaatar Circus Mongolia циркийн жүжигчид, Хөдөлмөрийн баатар С.Сүхбаатарын тэргүүлдэг Монголын бий биелгээний холбооны бүжигчид, уртын дуучин, соёлын тэргүүний ажилтан Д.Оюунжаргал, морин хуурч, хөөмийч, Соёлын тэргүүний ажилтан Д.Шинэцог Шинэцог-Гени / Shinetsog Dorjnaym Монголын Мастер тогоочдын холбооны мастер тогооч Н.Өлзийсайхан нарын 40 орчим хүний өргөн бүрэлдэхүүнтэй баг хамт олон хамтран ажиллаж, акробат, уран нугаралт, хүндийн өргөлт, хошин үзүүлбэр гэх мэт циркийн үндсэн элементүүдээс гадна ардын язгуур урлаг, монгол бүжиг, морин хуур, уртын дуу зэрэг үндэсний соёл урлагийн үзүүлбэрүүдээ толилуулав.

---