Суданы иргэд төрийн эргэлтийг эсэргүүцэн жагсжээ

Суданы арми төрийн эрхийг гартаа авсныг эсэргүүцсэн хэдэн зуун мянган иргэн өнгөрөгч ням гарагт эсэргүүцлийн жагсаал зохион байгуулжээ. Энэ нь мөн ардын бослогын гурван жилийн ойг тохиолдуулан хийсэн арга хэмжээ юм. 

Жагсагчид нийслэл Хартум хот дахь Ерөнхийлөгчийн ордон руу чиглэн алхсан бөгөөд "Ард түмэн илүү хүчирхэг, ухрах боломжгүй" хэмээн хашхирч байжээ. Энэ үеэр аюулгүй байдлын албаныхан иргэд рүү нулимс асгаруулагч хий цацаж, тэднийг зогсоосон байна. Тус улсын Ерөнхийлөгчийн ордонд одоо төрийн эргэлтийн удирдагч генерал Абдель Фаттах аль-Бурхан байрлаж байгаа аж.

Түүнчлэн Суданы өөр хэд хэдэн хотод эсэргүүцлийн жагсаал өрнөсөн бөгөөд жагсагчид тус улсын төрийн далбааг намируулж, төрийн эргэлтийн дараах бослогын үеэр амь үрэгдсэн иргэдийн гэрэл зургийг өндөрт өргөн явжээ. Цэргийн хүчнийхэн өнгөрөгч 10 дугаар сард Засгийн эрхийг авснаас хойш багадаа 45 идэвхтэн амиа алдаад байгаа юм.

Тус улсын иргэд 2019 онд мөн адил жагсаалууд зохион байгуулсны эцэст Суданыг олон жилийн турш дарангуйлсан Ерөнхийлөгч Омар аль-Баширыг түлхэн унагасан билээ. Үүний дараа, энгийн иргэд болон цэргийн удирдагчид төрийн эрх мэдлийг хуваалцах тохиролцоонд хүрсэн хэдий ч тус удирдагчид ийнхүү төрийн эргэлт хийжээ.

Эх сурвалж: BBC