УИХ-ын гишүүн, Нийслэлийн Засаг дарга бөгөөд Улаанбаатар хотын захирагч асан Э.Бат-Үүл, түүний хүү, "Гранд лайн" ХХК-ийн захирал Б.Чулуудай, ТОСК-ын захирал асан А.Гантулга, "Бэрэн групп" ХХК-ийн ерөнхий захирал Б.Мөнхтөр тэргүүтэй 11 хүний гэм буруутай, эсэхийг Чингэлтэй дүүргийн Эрүүгийн хэргийн анхан шатны шүүх энэ сарын 7-ноос эхлэн хэлэлцэж өчигдөр 22.35 цагийн үед шүүгч нар дүгнэлтээ танилцуулсан талаар бид мэдээлсэн.

Шүүх хурлаас Э.Бат-Үүл, А.Гантулга, Ю.Алтангэрэл, Б.Чулуудай, Д.Жаргалсайхан, Т.Гэрэлт-Од, Б.Мөнхтөр нарыг гэм буруутайд тооцсон. Харин Л.Нарантуяа, Ш.Ганхуяг, Д.Оюунжаргал, Ё.Гэрэлчулуун нарт холбогдох үйлдлийг хэрэгсэхгүй болгожээ.

Өнөөдөр буюу 2021 оны арванхоёрдугаар сарын 16-ны 10.00 цагт гэм буруутай гэж дүгнэсэн долоон хүнд эрүүгийн хариуцлага оноох шүүх хурлыг товлож завсарласан. 

Чингэлтэй дүүргийн Эрүүгийн хэргийн анхан шатны шүүхээс Нийслэлийн Засаг дарга бөгөөд Улаанбаатар хотын захирагч асан Э.Бат-Үүлд дөрөв, ТОСК-ын захирал асан А.Гантулгад таван жилийн ял оноож, Б.Чулуудай нарын дөрвөн хүнд торгох ял оноожээ. Тухайлбал, Б.Чулуудайг 15 сая, Ю.Алтангэрэлийг 10.5 сая, Д.Жаргалсайханыг 9.7 сая, Т.Гэрэлт-Одыг 120 сая төгрөгөөр тус тус торгох ял шийтгэсэн байна. 

Харин, "Бэрэн" группийн ерөнхий захирал Б.Мөнхтөрийн хэргийн хөөн хэлэлцэх хугацаа нь  дууссан гэдэг үндэслэлээр хэрэгсэхгүй болжээ. Гэхдээ Б.Чулуудайн "Гранд лайн" ХХК-ийн хувьцааг худалдан авсан есөн тэрбум төгрөгийг "Бэрэн" группээс гаргуулахаар шийдвэрлэжээ. 

---