Мексикийн хууль бус хар тамхины наймаачин, "Синалоа" зэвсэгт бүлгийн толгойлогч байсан зартай гэмт этгээд Хоакин "Эль Чапо" Гузманы эхнэр Эмма Коронел Айспуро нөхрийнхөө гэмт хэргийн үйл ажиллагаанд тусалсан хэргээр гурван жилийн хорих ял сонсжээ.

32 настай Айспурод бүх насаар нь хорих ял өгч магадгүй байсан хэдий ч тэрээр өнгөрөгч 6 дугаар сард бүх гэм буруугаа хүлээн, гэмшиж буйгаа илэрхийлсний дараа АНУ-ын прокурорууд түүний ялыг богиносгохыг хүссэн юм. Харин 64 настай "Эль Чапо" одоо Колорадо мужийн шоронд бүх насаараа хоригдох ял эдэлж байгаа билээ.

Айспуро хууль бусаар хар тамхи тарааж, Гузманыг Мексикийн шоронгоос оргоход тусалсан гэдгээ хүлээн зөвшөөрсөн байна. Шүүхийн баримт бичигт дурдсанаар, Айспуро "Эль Чапо" болон "Синалоа" бүлгийн бусад гишүүнтэй хамтран кокайн, героин, метамфетамин, марихуаныг АНУ руу нэвтрүүлж, мөнгө угаах ажиллагаанд оролцсон аж.

Вашингтонд өнгөрөгч мягмар гарагт болсон шүүх хурлын үеэр шүүгч Рудольф Контрерас Айспурог бараг 1.5 сая ам.доллар хураалган, шоронгоос суллагдсаныхаа дараа дөрвөн жилийн хугацаанд хяналт дор байхыг тушаажээ.

Эх сурвалж: BBC

---