Ипотекийн зээлийн урьдчилгааг 20 хувь болгох боломжтой

Өчигдөр буюу 11 дүгээр сарын 8-нд “Орон сууц ба санхүүжилт” хэлэлцүүлэг зохион байгуулагдаж, иргэдээ эрүүл аюулгүй орчинд амьдруулах нэг шийдэл болох орон сууцжуулалт ба түүний эх үүсвэр, санхүүжүүлэх боломж зэргийн талаар холбогдох албаныхан санал солилцсон.

Энэ үеэр Барилга хот байгуулалтын сайд Б.Мөнхбаатар "Гэр хорооллын дөрвөн айлын газар дээр 96 айлын орон сууцыг төлөвлөлтгүй, зураггүй, дэд бүтэцгүй барьж болохгүй. Орон сууцны санхүүжилтийн гол асуудал нь иргэдэд урьдчилгаа төлбөр бэлэн байхгүйд байна. Тиймээс орон сууцны урьдчилгаа төлбөрийг 20 хувь болгох гарц шийдлийг эрэлхийлж ярилцаж байна" гэлээ.

Түүнчлэн БХБ-ын дэд сайд Э.Золбоо "Ипотекийн зээл бол хамгийн чанартай зээл юм. Ипотекийн дундаж зээл 70 сая төгрөг байгаа бөгөөд иргэд дунджаар сард 412 мянган төгрөг төлж байна. Үүний тулд өрхийн орлого 900 мянган төгрөг байх ёстой. Статистик судалгаагаар манай өрхийн дундаж орлого 1 сая 542 мянган төгрөг байна. Өөрөөр хэлбэл, иргэд ипотекийн зээл аваад эргэн төлөх чадамж бүрэн байна" гэсэн юм. 

Барилга, хот байгуулалтын яамны Бодлого, төлөвлөлтийн газрын дарга Б.Гүнболд "Ирэх 2022 оны нэгдүгээр сарын 1-нээс эхлэн урьдчилгаа 20 хувиа бүрдүүлсэн иргэд ипотекийн зээлд хамрагдах боломж нээгдэнэ. Хууль эрхзүйн орчныг бүрдүүлсэн. Одоо холбогдох дүрэм, журмыг боловсруулаад ирэх оноос хэрэгжүүлэхээр ажиллаж байна" хэмээн тодотгов.