Гайти улсын Ерөнхийлөгч Жовенел Моисегийн амийг хөнөөсөн хэрэгт холбогдох этгээдийг Туркийн Истанбулын нисэх онгоцны буудлаас баривчилсан гэж албаныхан мэдээлжээ.

Самир Хандал гэх бизнесмэн нь АНУ-аас Йордан руу явахдаа Турк улсаар дамжин өнгөрч байгаад саатуулагдсан байна. Түүнийг Жовенел Моисегийн аллагын гол хэрэгтэн болох Кристиан Эммануэль Санон хэмээх гайти эмчийн холбоотон гэж сэжиглэж байгаа юм. Гайтийн хууль хяналтынхан одоогийн байдлаар энэ хэрэгтэй холбоотой нийт 40 гаруй сэжигтнийг баривчлаад байгаа билээ.

Тус улсын Гадаад хэргийн сайд Клод Жозеф энэ удаагийн баривчилгаанд туслалцаа үзүүлсэн Туркийн Гадаад хэргийн сайдад талархал илэрхийлсэн байна. Самир Хандал яг ямар хэрэг үйлдсэн нь одоогоор тодорхойгүй байгаа ч Туркийн эрх баригчид Интерполоос гаргасан олон улсын баривчлах тушаалын дагуу түүнийг саатуулсан гэж мэдэгджээ.

Ерөнхийлөгч Жовенел Моисе өнгөрөгч 7 дугаар сарын 7-ны шөнө Гайти улсын нийслэл Порт-о-Пренс дэх гэртээ унтаж байхад нь мэргэжлийн зэвсэглэсэн бүлэг этгээд дайрч орон, амь насыг нь хөнөөсөн юм.

Эх сурвалж: BBC

---