300 метрийн гүн агуйд хоёр хоног гацсан бэртэлтэй эрэгтэйг аварчээ

Их Британийн бүрэлдэхүүн Уэльсийн өмнөд нутагт байрладаг Огоф Финнон Дду агуйд бэртэж, гацсан агуй судлаачийг 54 цагийн аврах ажиллагааны дараа эсэн мэнд аварч чаджээ. Агуй судлаач эрэгтэй ойролцоогоор 300 метр гүн агуйд өнгөрсөн бямба гарагийн 13 цагийн үед унаж гацсан байна. Түүнийг аврах ажиллагаа хоёр хоног гаруйн турш үргэлжилсээр даваа гарагийн орой 19:45 цагт өндөрлөжээ.

Аврагчдын хэлж байгаагаар Уэльсийн түүхэнд хамгийн удаан хугацаанд үргэлжилсэн агуйн аврах ажиллагаа болсон гэжээ. Өмнө нь 41 цагийн турш үргэлжилсэн аврах ажиллагаа хамгийн удаанд тооцогдож байжээ.

Агуйд унасан эрэгтэйн эрүү, хөл хугарч, нуруу нугасны гэмтэл авсан боловч амь насанд нь халгүй гэмтэл гэж эмч нар мэдээлжээ. Эрэгтэй хүнд бэртсэн тул түүнийг аварсны дараа эмнэлгийн тусламж үзүүлэх баг бүрэн бүрэлдэхүүнээрээ ажиллажээ. Их Британийн хамгийн урт агуйнуудын нэгт гацсан эрэгтэйг аврах ажилд 250 орчим сайн дурын аврагч тусалсан байна. Зарим аврагч газрын гадаргуугаас доош агуйн хэсэгт 12 цагийн турш үүрэг гүйцэтгэжээ.

Аврах ажиллагааны хоёр дахь хоногт бороо орж, өтгөн манантай байснаас үзэгдэх орчин хязгаарлагдмал байжээ. Гэсэн ч аврагчид ажлаа зогсоолгүй үргэлжлүүлсэн байна. Эрэгтэй биеийн дулаанаа алдаагүй, биеийн байдал нь тогтвортой байсан бөгөөд эмнэлэгт хүргэжээ.

Огоф Финнон Дду агуйг 1946 онд нээн илрүүлж байжээ. Гол горхи, хүрхрээ арвин их уулархаг бүсэд байрладаг байна.

Эх сурвалж: The Guardian