БНСУ-ын гадаадын оршин суугчдын дунд халдвар хурдацтай тархаж байна

Өмнөд Солонгост цар тахлын шинэ давлагаа дэгдэж байгаа энэ үед гадаадын оршин суугчдын дунд халдварын тархалт эрчимтэй нэмэгдэж байгааг орон нутгийн эрүүл мэндийн байгууллагууд онцолж байна.

Тус улсын Гамшгаас хамгаалах төв штабаас мэдээлснээр, 9 дүгээр сарын 19-25-ны хооронд нийт 2,305 гадаадын иргэн коронавирусээр өвчилсөн болох нь батлагдсан бөгөөд энэ нь өнгөрөгч 8 дугаар сарын дундуур бүртгэгдсэн 940 тохиолдлоос өндөр үзүүлэлт юм.

Өнгөрсөн долоо хоногт цуглуулсан мэдээллээр 100 мянган гадаадын оршин суугчид ногдох халдварын түвшин 100 мянган солонгос иргэнд ногдох халдвараас ес дахин их байгаа аж. Харин гадаадын оршин суугчдын вакцинжуулалтын түвшин харьцангуй бага байгаа билээ.

Тодруулбал, 100 мянган хүнд ногдох халдварын тоог авч үзэхэд гадаадын иргэдийн дунд 208 байгаа бол солонгосчуудын хувьд 23-тай байгаа юм. Түүнчлэн, вакцинжуулалтын түвшний хувьд солонгос иргэдийн 44.4 хувь нь вакцины бүх тунгаа тариулаад байгаа бол гадаадын иргэдийн зөвхөн 24.4 хувь дархлаажуулалтад бүрэн хамрагдаад байгаа аж.

БНСУ-ын Дотоод хэрэг, аюулгүй байдлын сайд Жон Хэ Чол энэ талаар "Цар тахлын халдвар авсан гадаадын өвчтөнүүдийн тоо хоёр долоо хоног дараалан нэмэгдэж байна. Тэр дундаа Чүнчон, Жолла, Хойд Кёнсан мужийн зарим бүс нутагт гадаадын иргэд нийт өвчтөний 30-аас дээш хувийг эзлэх болсон нь санаа зовоож байна. Бичиг баримтгүй гадаадын иргэдэд хүрэх мэдээлэл дутмаг байгаагаас дархлаажуулалтад хамрагдах идэвх муу байгаа юм" хэмээн тайлбарлажээ.

Тэгвэл тус улсын Хөдөлмөрийн яамны зүгээс вакцин тариулах хүсэлтэй хууль бус оршин суугчдад ямар ч сөрөг нөлөө үзүүлэхгүй төрийн бодлогыг сурталчлах чиглэлээр үйл ажиллагаа явуулах болно гэж мэдэгдээд байна.

Эх сурвалж: The Korea Times