Израилд коронавирусээр өвчлөөд, эдгэрсэн иргэдийг вакцинжуулна
Израилд коронавирусээр өвчлөөд, эдгэрсэн хүмүүс вакцины нэг тун тариулах ёстой гэж тус улсын Эрүүл мэндийн яамнаас мэдээлжээ.
Ингэснээр иргэд "Green Pass" авах боломжтой бөгөөд энэ нь аливаа арга хэмжээ, аж ахуйн нэгжид нэвтрэх бичиг болох юм. Энэхүү үнэмлэх нь вакцинжуулалтын нотолгоо эсвэл коронавирусийн шинжилгээний "Сөрөг" хариуг батлах зориулалттай аж. Гэхдээ шинэ дүрмийн дагуу цар тахлын халдвар аваад, эдгэрсэн хүмүүс "Green Pass"-аа хадгалахын тулд дархлаажуулалтад хамрагдах шаардлагатай гэнэ.
Албаныхны мэдээлснээр уг шинэ журам ирэх 10 дугаар сарын 3-наас хэрэгжиж эхлэх аж. Энэхүү өөрчлөлт нь цар тахал эхэлснээс хойш халдвар авсан 1.2 сая орчим израилчуудад нөлөөлөх төлөвтэй байна.
Түүнчлэн, вакциныхаа хоёр дахь тунг тариулснаас хойш зургаан сарын дараа нэмэлт тундаа хамрагдаагүй иргэдийн "Green Pass" үнэмлэхийг цуцалж магадгүй байна.
Тус үнэмлэх нь олон израилчуудын хувьд зайлшгүй хэрэгцээтэй зүйл болоод байгаа билээ. Иргэд уг бичиг баримтаар дамжуулан сургууль, өргөн цар хүрээний аж ахуйн нэгжүүдэд нэвтрэх боломжтой бөгөөд ажил, албан үүргээ гүйцэтгэхэд нь ч мөн шаардлагатай юм.
Израилын ихэнх ажил олгогч "Green Pass"-гүй ажилтнуудаа шалтгаангүйгээр ажлаа тасалсан гэж тооцож байгаа бөгөөд энэ нь ажлаа алдахад ч хүргэж болзошгүй аж.
Эх сурвалж: UPI
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.