"Оролцоо" төслийн 5, 6-р ээлжийн оролцогчид үйлдвэрлэлийн үйл ажиллагаатай танилцлаа

Зэвсэгт хүчний 119 дүгээр ангийн Хуурай замын цэргийн сургалтын төв, Олон улсын хүүхдийн Найрамдал цогцолборт “Оролцоо” төслийн 5,6 дугаар ээлжид оролцож буй залуучуудыг бизнесийн байгууллага, тэр дундаа үйлдвэрлэлийн үйл ажиллагаатай танилцах, ажил мэргэжлийн чиг баримжаа олгох, ажлын байрны урьдчилсан төсөөлөл, дэвшилтэт технологи, хөдөлмөрийн аюулгүй ажиллагааны мэдлэг, ойлголттой болгох зорилгоор “ҮЙЛДВЭРЛЭЛТЭЙ ТАНИЛЦАХ БИЗНЕС АЯЛАЛ”-ыг “Дашваанжил” ХХК, “Долоон болдог” ХХК-ийн дэмжлэгтэйгээр Нийслэлийн Хөдөлмөр эрхлэлтийн газар, Эйч ар клуб ТББ хамтран зохион байгууллаа.

1992 онд үүсгэн байгуулагдсан байгальд ээлтэй хийн түлшийн зөв зохистой хэрэглээг Монгол улсын нийт иргэдэд түгээн таниулах, олон улсын стандартын шаардлагыг хангасан хийн хангамжийн технологи, үйлчилгээг хэрэглэгчдэд хүргэн ажиллаж буй “ДАШВААНЖИЛ” ХХК болон  гэр ахуй, албан хэрэгцээний бүхий л тавилгыг дэлхийн жишигт нийцүүлэн үйлдвэрлэж, гал тогооны цахилгаан хэрэгслийн брэнд бүтээгдэхүүнийг албан ёсны эрхтэйгээр Монголын зах зээлд амжилттай борлуулан ажиллаж буй “ДОЛООН БОЛДОГ” ХХК буюу Kitchen all –ийн хамт олон "Оролцоо" төсөлтэй хамтран ажиллажээ.

Энэ аялал нь залуучууд бизнесийн байгууллага, бодит үйлдвэрлэлийн үйл ажиллагаатай танилцах, ажил мэргэжлийн чиг баримжаа авах, ажлын байрны урьдчилсан төсөөлөлтэй болох, дэвшилтэт технологи, хөдөлмөрийн аюулгүй байдал, эрүүл ахуйн ойлголт мэдээлэлтэй болох зорилготой юм.

"Оролцоо" төсөл энэ сарын 2-16-ны хооронд эхний дөрвөн ээлжээ хүлээн авч 14 хоногийн вакумжуулсан багц сургалтад 1211 залууг хамруулсан. Одоогоор 5, 6 дугаар ээлжийн нийт 728 залуу хоёр хотхон дээр сургалтдаа хамрагдаж байна. Эхний дөрвөн ээлжийн залуучууд эхнээсээ ажлын байран дахь дадлагаа эхлүүлээд байгаа юм.