Сүргийн дархлаа 80 хувьд хүрэхэд коронавирус улирлын чанартай болно
Коронавирусийн цар тахлын эсрэг сүргийн дархлаа 80 хувийн түвшинд хүрсэн тохиолдолд тус вирус нь улирлын чанартай өвчин болж хувирах магадлалтай гэж ОХУ-ын Тархвар судлалын төв хүрээлэнгийн дэд захирал Александр Горелов хэлжээ.
Тэрээр "Сүргийн дархлаа 80 хувьтай болсон тохиолдолд коронавирус улирлын шинж чанартай өвчин болно гэсэн маш тодорхой урьдчилсан таамаглалыг гаргах боломжтой. Сүргийн дархлаа нь вакцинжуулалтын дараах ба байгалийн гаралтай гэсэн хоёр бүрэлдэхүүн хэсгээс бүрдэнэ. Өмнө нь бид сүргийн дархлааг 60 хувьтай байхад хангалттай гэж таамаглаж байсан хэдий ч одоо дэлхий даяар энэ тоог дахин хянаж үзэж байна" хэмээн "ТАСС" агентлагт ярьсан байна.
Одоогийн байдлаар Оросын хүн амын зөвхөн гуравны нэг нь л цар тахлын эсрэг дархлаатай болоод байгаа юм.
Энэ талаар Горелов "Сүргийн дархлаанд хүрэх хугацаа нь вакцинжуулалтын хурднаас шууд хамаардаг бөгөөд бид дархлаажуулалтын талаарх мэдлэг, идэвхийг нэмэгдүүлэх хэрэгтэй" гэж онцлон тэмдэглэжээ.
Эх сурвалж: TASS
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.