БНСУ-д халдварын өдөр тутмын тохиолдол хамгийн дээд хэмжээндээ хүрчээ

БНСУ-д өнөөдөр /2021.09.24/ коронавирусийн халдварын 2,434 шинэ тохиолдол бүртгэгдсэнээр өдөр тутмын тохиолдлын тоо цар тахал эхэлснээс хойших хамгийн дээд хэмжээндээ хүрчээ.

Энэ нь тус улсын "Чусог" буюу Ургацын баярын үеэрх их хэмжээний хөл хөдөлгөөнтэй холбоотой аж. Энэ долоо хоногийн даваа гарагаас лхагва гараг хүртэл үргэлжилсэн бүх нийтийн амралтын өдрүүдээр сая сая иргэн төрөлх хотдоо очсон нь халдвар улс даяар хурдацтай тархах шалтгаан болсон байна.

"Чусог"-ийн баяртай холбогдуулан Өмнөд Солонгосын Засгийн газраас иргэдийн цугларалтад тавьсан хоригийг хөнгөвчилж, нэг дор найман хүн цугларахыг зөвшөөрчээ. Гэхдээ эдгээр найман хүний дор хаяж дөрөв нь вакцинжуулалтад бүрэн хамрагдсан байх шаардлага тавьсан аж. Харин өнөөдрөөс эхлэн хязгаарлалтыг дахин чангатгаж, нэг дор цугларах боломжтой хүмүүсийн тоог дээд тал нь зургаа болгож өөрчилсөн байна.

Тус улс даяар коронавирусийн дельта хувилбар хурдацтай тархаж байгаатай холбогдуулан сүүлийн 80 хоногийн турш өдөр тутмын тохиолдлууд мянга гаруй байсаар ирсэн билээ. Өмнө нь энэ оны 8 дугаар сарын 10-ны өдөр 2,221 тохиолдол бүртгэгдэж, өдөр тутмын хамгийн дээд хэмжээг тогтоогоод байсан юм.

Өмнөд Солонгост одоогийн байдлаар 37.1 сая хүн буюу тус улсын нийт хүн амын 72.3 хувь нь цар тахлын эсрэг вакцины эхний тунгаа тариулаад байгаа бол 22.6 сая хүн буюу нийт хүн амын 44 хувь нь дархлаажуулалтад бүрэн хамрагджээ. Тэгвэл тус улсын эрх баригчид ирэх 10-12 дугаар саруудад 12-17 насны өсвөр насны хүүхдүүд болон жирэмсэн эмэгтэйчүүдийг вакцинжуулахаар төлөвлөж байна.

Эх сурвалж: Yonhap News Agency