Монгол, Оросын хамтарсан “Улаанбаатар төмөр зам” ХНН-ийн дарга Д.Жигжиднямаа өнгөрөгч долдугаар сард хүнд өвчний улмаас нас барсан. Гэвч түүний оронд томилох хүнийг сонгуулахаар Оросын талд гурван хүнийг нэрийг явуулсан билээ. 

“УБТЗ”-ын даргад Ц.Хүрэлбаатар, Б.Даваасүрэн, Г.Сэрээнэндорж нарын гурван хүн санал болгосон ч Оросын тал зөвшөөрсөнгүй гэх мэдээллийн дагуу ЗТХ-ийн дэд сайд Ж.Бат-Эрдэнээс тодрууллаа.

-Хүлээн зөвшөөрсөнгүй гэдэг мэдээлэл хаанаас гарсныг мэдэхгүй. Оросын талаас дээрх гурван хүнийг албан ёсоор хүлээн зөвшөөрөхгүй гэдэг хариуг одоохондоо аваагүй байна. Оросын талаас бол УБТЗ-ын дарга бол туршлага, мэдлэг чадвартай, олон улсын тавцан дээр ажиллах, төрийн байгуулагуудтай харилцах чадвартай ийм хүн байвал сайн байна гэсэн санал явж байгаа.

-Ямар дүрмийн дагуу шийдэх вэ?

-УБТЗ-ын дүрэм гэж байдаг. Тэр дүрмийнхээ хүрээнд асуудал яригдаад явж байгаа.

-Оросын талтай хэзээ уулзаж ярилцах вэ?

-Оросын талтай хамтарч ажиллаж байна. Одоогоор хэдийн хугацаанд гэж хэлэх боломжгүй.

-Нэр яригдсан гурван хүний хувьд авлига, хээл хахуултай холбогдсон гэх асуудлаар Оросын тал хүлээн зөвшөөрөхгүй байна гэдэг мэдээлэл явж байгаа?

-Тэрийг бол мэдэхгүй.

-Дээрх гурван хүнийг хүлээн зөвшөөрөхгүй бол дөрөв дэх хүний асуудал яригдах уу?

-Санал болгосон гурван хүнийг хүлээн зөвшөөрөхгүй гэсэн албан ёсны мэдээлэл алга. Ямар ч байсан Оросын талтай хамтарч ажиллана. Хаа хаанаа томилгооны асуудлыг яаравчлах шаардлагатай байгаа. Тэр талаар ажиллаж байна.

---