Парис хотод хурдны дээд хязгаарыг 30 км/цаг байхаар тогтжээ

Францын нийслэл Парис хотын авто замуудад автомашины хурдны дээд хязгаарыг 30 км/цаг байхаар эрх баригчид шийдвэрлэжээ. Энэ нь агаарын бохирдлыг бууруулж, авто замын аюулгүй байдлыг сайжруулах ач холбогдолтой гэж үзжээ. Уг шийдвэр хотын бараг бүх замд хэрэгжинэ гэж эх сурвалжууд мэдээлж байна.

Гэвч зарим иргэний зүгээс автомашины хурдыг сааруулах нь агаарын бохирдлыг бууруулахад хувь нэмрээ оруулна гэдэгт итгэлгүй байгаа ажээ. Мөн энэ нь хотын түгжрэлийг улам дордуулж, улмаар байгалийн хийн ялгарлыг нэмэгдүүлж ч магадгүй гэж шүүмжилсэн байна. Харин хүргэлтийн бизнес эрхлэгчид уг шийдвэрийг эрс эсэргүүйэж байна.

Эрх баригчид хэт удаан явахаас залхсан тохиолдолд хурдны өөр зам сонгох болон автомашинаас өөр хэлбэрээр зорчих сонголт хийхэд нөлөөлнө гэж таамаглажээ. Хурдны дээд хязгаарыг бууруулахаас гадна Парис хотын төв дэх автомашины 144,000 зогсоолын 60,000-ыг нь чөлөөлж, газар доогуурх зогсоолуудын хүртээмжийг нэмэгдүүлэхээр төлөвлөсөн байна. Мөн явган зорчигчдод алхах талбайг ихээр бий болгож, мод, ногоон ургамал тарьж, дугуйн замуудын тоог нэмэгдүүлэх ажээ.  

Хотын зөвлөлийн явуулсан судалгаагаар Парисын оршин суугчдын 59 хувь нь хурдны шинэ хязгаарыг таатай хүлээн зөвшөөрч байна. Уг шийдвэр энэ долоо хоногоос хэрэгжиж эхэлжээ.

Эх сурвалж: CNN