Нөхөн сонгуульд М.Чингисхаан, С.Жавхлан, Х.Бат-Ялалт, А.Отгонбаатар нар өрсөлдөнө

УИХ-ын 28-р тойрог/СХД/, 18-р тойрог/Хэнтий аймаг/-т ирэх 10-р сарын 10-нд болох нөхөн сонгуульд өрсөлдөгчид тодорсоор байна. Энэ сонгуульд сонирхолтой олон нэр дэвшигч өрсөлдөхөөр бүртгүүлжээ.

Сонгинохайрхан дүүргийн 28-р тойрогт ширүүн тэмцэл өрнөнө

С.Эрдэнийн талын АН-аас хотын дарга асан Э.Бат-Үүлийг тус тойрогт сойхоор болжээ.

Харин эрх баригч МАН-аас саяхан нэгдсэн МАХН-ын дарга Н.Энхбаярын хүү Батшугар болон СХД-ийн засаг дарга Н.Алтаншагай хоёрын нэр яригдаж байна. Чухам хэн нь дийлэх нь тун удахгүй тодорхой болно. Э.Батшугарын хувьд тус тойргоос хоёронтоо өвдөг шороодсон тул нэр дэвших эрхээ авахын тулд идэвх чармайлт гаргаж байгаа сурагтай. Юутай ч МАН ноёлсон СХД-т МАН ялалт байгуулна гэдэгтээ итгэлтэй байгаа нь ойлгомжтой.

Харин ХҮН-аас намын дарга асан Б.Найдалааг дэвшүүлэхээр тогтжээ. Тус нам гэр хорооллоос санал бага авдаг гэсэн судалгаа бий. Тиймээс Б.Найдалаа гэр хорооллынхон түлхүү СХД-ээс сонгогдох магадлал маш муу.

Тэдний хажуугаар хүчтэй, сонирхолтой бие даагчид олон дэвшжээ. Тэдний хамгийн тод төлөөлөл бол Бие даагч иргэдийн холбоог төлөөлөх болсон Т.Ганболд. Тэрээр өмнөх УИХ-ын сонгуульд хар машинд луйвардуулаагүй бол сонгогдох байсан гэдэгтээ итгэлтэй байдаг эрхэм. 2020 оны УИХ-ын сонгуулиар маш өндөр санал авсан учир энэ удаад сонгогдох магадлал ч өндөр. 

Түүнтэй зэрэгцээд Иргэдийн шударга шүүх ТББ-ын тэргүүн Х.Бат-Ялалт мөн бие даан өрсөлдөхөөр шийджээ. Тэр олон нийтийн дунд төдийлөн нэр хүндтэй биш ч СХД-ийн худалдаа эрхлэгч, хувиараа бизнес эрхлэгч иргэдийн эрх ашгийн төлөө дуу хоолойгоо өргөж байсны хувьд сонгогдох итгэл тээжээ. 

Бас нэгэн сонирхолтой дүр бол УИХ-ын гишүүн асан, МУГЖ, дуучин С.Жавхлан. 2016 оны УИХ-ын сонгуульд БЗД-ээс нэр дэвшин ялалт байгуулж байсан эрхэм дуучин 2020 онд Увс аймагтаа очиж нэр дэвшээд 12403 хүний санал авсан ч унасан. Нутагтаа очиж унасан уураа ард түмэн, нутаг усандаа гаргаж, хэсэг зуур гоморхож явсан ч энэ удаад тойргоо сэлгэж СХД-ийн нөхөн сонгуулиас даагаа нэхэхээр шийджээ. Уг нь 2020 оны сонгуулийн өмнө АН-д элссэн ч энэ удаад бие даан нэр дэвших ажээ. 

Энэ тойрогт дахиад нэг хүчтэй өрсөлдөгч байгаа нь "Үнэн ба Зөв" намын дарга А.Отгонбаатар. 2020 оны сонгуулиар төрсөн нутаг Өвөрхангай аймагтаа нэр дэвшсэн ч гарч чадаагүй. Гэхдээ маш өндөр/9981 санал/ санал авсан тэрээр нөхөн сонгуулд азаа сорихоор шийджээ. 

Чингис хааны өлгий нутгаас М.Чингисхаан нэр дэвшинэ

Их эзэн Чинис хааны өлгий нутаг болсон Хэнтий аймгийн 18-р тойргийн нөхөн сонгуульд М.Чингисхаан өрсөлдөхөөр болжээ. Тэрээр Хэнтий аймагт очиж бие даан нэр дэвших эрхээ олж авахаар гарын үсгээ цуглуулж эхэлсэн байна. М.Чингисхаан 2020 оны сонгуульд Сүхбаатар дүүрэгт нэр дэвшиж, 671 хүний санал авсан юм. Энэ удаад тэрээр хэдэн санал авахаа үзэхээр шийджээ. 

Харин эрх баригч намаас УИХ-ын гишүүн асан, хүчирхийллийн хэргээр ял эдлээд суллагдсан Д.Гантулгыг нэр дэвшинэ гэх яриа гарчээ. Гэхдээ олон нийт түүнийг хүлээж авах нь эргэлзээтэй тул хоёр дахь хувилбар нь хуульч Л.Батжав гэх эрхмийн нэр яригдаж буй ажээ. Гэвч мөн л төдийлөн бүтэлтэй хүн бус гэх хэл ам дагуулдаг тул бүр болиод аймгийн засаг дарга Н.Ганбямба ч өрсөлдөх магадлалтай ажээ. 

С.Эрдэнийн талын АН-ын хувьд мөн хэд хэдэн хувилбар яригдаж байгаагийн нэг нь УИХ-ын гишүүн асан Б.Гарамгайбаатар. Тэрээр өөрөө ч өрсөлдөх бодолтойгоо нуугаагүй. Харин түүнтэй зэрэгцээд НИТХ-ын төлөөлөгч асан Ц.Баатархүү Хэнтийн нөхөн сонгуульд санаархаж байгаа гэх. Чухам хэн нь нэр дэвшихийг нам нь удахгүй зарлана. 

Юутай ч хоёр тойргийн нөхөн сонгуулийн сургаар олон нэр дэвшигч тодорсоор байна. Уг сонгуулийг зохион байгуулахад улын төсвөөс 2,3 тэрбум төгрөг зарцуулна. Нийт есөн нам, нэг эвсэл өрсөлдөхөөр бүртгүүлээд байна. Нэр дэвшигчид эцсийн байдлаар тодорч дуусахад нэг хоногийн хугацаа үлдлээ.