Бразил дахь Грек улсын Элчин сайд асан Кириакос Амиридисын эхнэр Франсуазе де Соуза Оливейра нөхрөө хөнөөсөн хэргээр 31 жилийн хорих ял сонсжээ.

Рио-де-Жанейро хотын албаныхан 2016 онд ноён Амиридисын цогцсыг шатсан автомашин дотроос олсон аж. Түүний эхнэр болох Франсуазе де Соуза Оливейра гэх бразил эмэгтэй нь орон нутгийн цэргийн цагдаагийн офицер Серхио Гоместой хайр сэтгэлийн холбоотой байсан бөгөөд тэд хамтран, элчин сайдын аминд хүрсэн болох нь тогтоогдсон юм. Гомес аль хэдийн гэм буруугаа хүлээн зөвшөөрөн, 22 жилийн хорих ялаар шийтгүүлээд байгаа билээ.

59 настай байсан Кириакос Амиридис 2001-2004 онд Рио-де-Жанейро хотод консулаар ажиллаж байгаад амиа алдсан жилдээ Бразилд буцаж ирэн, Элчин сайдаар ажиллаж байжээ. Тэрээр 2004 онд Франсуазетэй гэрлэсэн бөгөөд хосууд нэг охинтой аж.

Ноён Амиридис нас барахаасаа өмнө Зул сарын баярыг эхнэр, аав, ээжтэйгээ хамт өнгөрүүлэхээр нийслэл Бразилиа хотоос Риогийн хойд хэсэгт орших Нова Игуаку хот руу аялж байсан гэнэ. Гэвч удалгүй Франсуазе де Соуза Оливейра түүнийг сураггүй алга болсон гэж цагдаа нарт мэдэгдсэн байна.

Эх сурвалж: BBC

---