ХХААХҮЯ-аас отор нүүдэл, хадлан тэжээлийн бэлтгэл хэрхэн хангагдаж байгаа талаар МАА-н БХЗГ-ын дарга Д.Батмөнхөөс мэдээлэл авлаа.

2021-2022 оны өвөлжилт, хаваржилтын бэлтгэл хангах ажлыг орон нутгийн төр, захиргааны байгууллага, малчид, иргэд, аж ахуйн нэгжийн түвшинд сайтар ханган биелүүлэх ажлыг зохион байгуулж хэрэгжүүлэх, түүнд тавих хяналтыг сайжруулах зорилгоор Монгол Улсын Засгийн газраас дараах шийдвэр гаргасан.

Аймаг, сумын түвшинд бүрдүүлбэл зохих өвс, тэжээлийн аюулгүйн нөөцийг 10 дугаар сарын 20-ны өдрийн дотор бэлтгэж, шаардлагатай цэгүүдэд байршуулах.

Аймаг, сум аюулгүйн нөөцдөө 44 мянга 800 тонн өвс, 2800 тонн ногоон тэжээл, 15 орчим тонн тэжээл бэлтгэх чиглэлийг Засгийн газраас өгсөн. Нэг сая 200 мянган тонноос багагүй хадлан бэлтгэх боломжтой гэсэн тооцоо гаргасан.

Манай улсын хэмжээнд хадлангийн талбай 1.7 сая га байгаа. Хадлан авдаг бүс нутгийн хувьд Сүхбаатар, Дорнод, Хэнтий, Сэлэнгэ, Булган аймагт 70 гаруй хувь нь ногдож байгаа.

Хадлан бэлтгэх боломжгүй сумдын аюулгүй нөөцийн өвсийг хадлангийн нөөц талбай бүхий орон нутгийн удирдлагатай харилцан тохиролцож хадлангийн талбай ашиглах гэрээ хэлцлийг хийж бэлтгүүлнэ.

Отроор очсон малчид 2021 оны дөрөвдүгээр сарын 1 гэхэд бүс нутгийг чөлөөлсөн байх ёстой. Улсын тусгай хэрэгцээний аймаг дундын отрын бүс нутаг, Хилийн зурвас газар, Улсын тусгай хамгаалалттай газарт отроор өвөлжиж, хаваржих малчин өрх, малын тооны судалгааг урьдчилан гаргаж, холбогдох төрийн байгууллагаас зөвшөөрөл авч малын гоц халдварт, халдварт өвчнөөс урьдчилан сэргийлэх, шимэгчлэх өвчнөөс эмчлэн сэргийлэх арга хэмжээнд бүрэн хамрагдсан малыг отроор өвөлжүүлж хаваржуулах ажлыг зохион байгуулахаар зохицуулсан.

Тэгэхээр отроор явж байгаа бүх мал Мал эмнэлгийн үзлэг шинжилгээнд бүрэн хамрагдсан байх ёстой. Ийм малыг өөр аймаг, сумын нутагт отроор оруулах зохицуулалттай. Үүнээс өөр зохицуулалт байхгүй.

---