Говийн аймгуудад зуншлага төдийлөн сайнгүй байгаагаас үүдэн малчид отроор зусаж байна. Тухайлбал, Дундговь аймгийн 1000 гаруй өрхийн сая гаруй мал Говьсүмбэр, Дорноговь, Хэнтий зэрэг 12 аймгийн нутагт отор хийж байна.

Тус аймагт өнгөрсөн хавар болсон шороон шуурганы улмаар төл малынхаа тал хувийг алджээ. Улмаар уг шороон шуурганд есөн хүн нас барж, 90 гаруй айл орон гэргүй болж, 500 гаруй айлын хашаа нурж эвдрэн, 130 гаруй мянган толгой мал хорогдсон байдаг. 

Хэдийгээр отор, нүүдэл хийхэд орон нутаг хоорондоо тохиролцон, отрын айл байлгах талаар зөвшилцдөг ч нутгийн иргэд бэлчээр, усаа харамлан оторчдыг хөөж, туух асуудал их гардаг байна. Тиймээс бэлчээрийн асуудалд төрөөс тодорхой бодлого, зохицуулалт шаардлагатай байгааг малчид онцолж байна.

 

---