Монголын багийн элч төлөөлөгч Хакүхо М.Даваажаргал баг тамирчдаа дэмжиж байна
"Токио-2020" олимпын наадмын Монголын багийн элч төлөөлөгч, сүмо бөхийн 69 дэх их аварга Хакүхо М.Даваажаргал баг, тамирчдаа дэмжиж байна.
Эдгээр өдрүүдэд их аварга Хакүхо М.Даваажаргал тэмцээнүүд дээр хүрэлцэн очсон бөгөөд мөн Монголын багийн штабаар зочилж, арын албанд зүтгэж буй хүмүүстэй уулзан, амжилт хүсжээ.
Их аварга 7 дугаар сарын Нагоя башёд нэг ч уналгүй түрүүлж, Олимпын багийнхандаа том бэлэг барьсан билээ. Энэ нь түүний дээд зиндааны 45 дахь түрүү бөгөөд уг амжилт эвдэгдэхгүй байх хэмээн мэргэжилтнүүд таамаглаж буй. Хүнд гэмтлийн улмаас жил гаруй хугацаанд түрүүлж чадалгүй өнжиж, зодог тайлах сануулга авч байсан гэдэг утгаараа энэ удаагийн түрүү илүү үнэ цэнтэй байсан юм.
Түүний аав, дархан аварга Ж.Мөнхбат 1964 оны Токиогийн Олимпод оролцсон Монголын багийн гишүүн байсныг бид мэднэ. Аварга тэрхүү Олимпод медалийн төлөө өрсөлдөөд, 8 дугаар байрт орсон бол 1968 оны Мехикогийн Олимпоос анхны мөнгөн медалийг эх орондоо авчирсан түүхтэй.
Хакүхо аварга Олимпын наадмын турш Монголын баг, тамирчдад том нөмөр нөөлөг болох нь гарцаагүй.
Эх сурвалж: МҮОХ
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.