Нийт хүн амын 60 хувь нь коронавирусийн эсрэг вакцины бүрэн тунд хамрагджээ

Засгийн газрын ээлжит хуралдаан 2021 оны 7 дугаар сарын 28-нд болсон бөгөөд энэ үеэр коронавируст халдварын цар тахлын нөхцөл байдал, хэрэгжүүлж буй хариу арга хэмжээний талаар Монгол Улсын Шадар сайд С.Амарсайхан Засгийн газрын гишүүдэд танилцуулав.

Монгол Улсын Засгийн газар дөрвөн төрлийн вакцины 5,226,670 тун татан авч, хүн амаа вакцинжуулж байгаа билээ. Тэгвэл 2021 оны 7 дугаар сарын 27-ны байдлаар улсын хэмжээнд нийт хүн амын 66.2 хувь нь нэгдүгээр тунд, 60.1 хувь нь хоёрдугаар буюу бүрэн тундаа хамрагдаад байна.

Мөн 2021 оны 7 дугаар сарын 27-ны байдлаар улсын хэмжээнд коронавируст халдварын үед шаардлагатай 38 нэр төрлийн нийт 4.5 тэрбум төгрөгийн эмийн нөөцтэй, вирусийн эсрэг 3.0 тэрбум төгрөгийн эмийн нөөцтэй байгаа аж.

Үүнтэй холбогдуулан хилийн боомт дээр үүссэн бөөгнөрөл саарч, ачаа тээврийн эргэлт хэвийн хэмжээнд орох хүртэл хугацаанд хүний амь нас, эрүүл мэндийг хамгаалахад зайлшгүй шаардлагатай бараа бүтээгдэхүүн, эм эмнэлгийн хэрэгсэл, тоног төхөөрөмжийг мөн эдийн засгийн болон стратегийн ач холбогдол бүхий бүтээн байгуулалтын ажил гүйцэтгэж буй төрийн өмчит хуулийн этгээд, зарим аж ахуйн нэгжийн уг ажилд нэн шаардлагатай ачааг зөөж буй тээврийн хэрэгслийг холбогдох төрийн байгууллага, хуулийн этгээдийн хүсэлтэд тулгуурлан дараалал харгалзахгүй улсын хилээр нэвтрүүлэхийг Замын-Үүд хилийн боомтын зөвлөлд даалгасан байна.