ОХУ-ын төрийн телевиз Украйны тамирчдын оронд зар сурталчилгаа үзүүлжээ

ОХУ-ын төрийн мэдлийн "Первый канал" телевиз "Токио-2020" олимпын наадмын нээлтийн арга хэмжээг дамжуулж байх үеэрээ Украйны баг, тамирчдын оронд зар сурталчилгаа гаргасан нь ихээхэн шүүмжлэл дагуулж байна.

Энэ удаагийн Олимпын наадамд оролцох олон улсын баг, тамирчдын жагсаалын үеэр "Первый канал" суваг нь Угандагийн тамирчид гарч ирэхээс өмнөхөн шууд дамжуулалтаа таслан, зар сурталчилгаа явуулсан бөгөөд Уругвайн баг, тамирчдын жагсаалын үеэр буцаад дүрсээ өгөн, нэвтрүүлгээ үргэлжлүүлсэн аж. Ингэснээр тэд Украйны 155 тамирчныг тэр чигээр нь алгассан гэсэн үг юм.

Гэвч тус телевизийн зүгээс энэ нь санаатайгаар зохион байгуулсан алхам байсан гэдгийг эрс няцааж, хуваарийн дагуух сурталчилгааны завсарлага байсан гэж мэдэгдсэн байна. "Первый канал"-ын төлөөлөгч "Тамирчдын парад хоёр цаг орчим үргэлжилдэг бөгөөд бид реклам, зар сурталчилгааны гэрээний үүргээ биелүүлэхийн тулд шууд дамжуулалтыг хэд хэдэн удаа тасалсан" хэмээн "РБК" агентлагт хэлжээ.

Үүнээс өмнө Олон улсын олимпын хорооноос Крымыг Украйнаас тусад нь дүрсэлж харуулсан газрын зургийг нийтэлж, олон нийтийн эсэргүүцлийг төрүүлээд байсан бөгөөд удалгүй энэ алдаагаа залруулсан юм. Москвагийн зүгээс 2014 онд Крымыг цэргийн хүчээр эзлэн, өөртөө нэгтгэсэн билээ.

ОХУ, Украйны хоорондох мөргөлдөөн сүүлийн долоон жилийн турш үргэлжилж байгаа бөгөөд саяхан "Хойд урсгал-2" байгалийн хий дамжуулах хоолойн асуудлаар дахин ширүүн маргаан үүсээд байгаа юм. Оросын зүгээс энэ долоо хоногт Украйны эсрэг улс хоорондын нэхэмжлэлийг Европын хүний ​​эрхийн шүүхэд хүргүүлсэн байна.

Эх сурвалж:  The Moscow Times