Үндэсний их баяр наадмыг тогтсон хугацаанд зохион байгуулагдахаар хуульчлагдсан байдаг. Энэ жил ковидтой холбоотой цахим байдлаар үзэгчгүйгээр Хүй долоон худагт зохион байгуулахаар Засгийн газраас шийдвэрлэсэн.

Ардын хувьсгалын 100 жилийн ойг тэмдэглэхээр бүтэн жилийн хугацаанд төлөвлөж бэлдсэн. Үүнийг баяр наадамтай холбож болохгүй. Ойн баярыг зохион байгуулах 9 салбар хороод байдаг. Наадмын төсвийг Нийслэлийн төсвөөс гаргадаг. Наадмын төсөв өмнөх жилд 2.8-3 тэрбум төгрөг зарцуулдаг. Энэ жил энэ төсвөөс хэтрүүлэхгүй байхаар зохион байгуулалтыг хийнэ. Хүй долоо худагт цахим наадмыг зохион байгуулж, ард түмэнд шууд дамжуулан хүргэнэ. 

10 тэрбумын төсвийн асуудал бол Үндэсний их баяр наадмын төсөв биш Ардын хувьсгалын 100 жилийн ойн бүтэн жилийн арга хэмжээний төсөв гэж ойлгох хэрэгтэй.

Соёлын дэд сайд М.Батбаяр: Ардын хувьсгалын ойг тэмдэглэн өнгөрүүлэх төлөвлөгөө 2020 оны наймдугаар сард баталсан. Нийтдээ 45 арга хэмжээний төлөвлөгөөг баталж байсан. Үүний нийт зардал нь 10 тэрбум төгрөгөөр байхаар баталсан. Энэ нь Үндэсний их баяр наадамд хамаарахгүй гэдгийг зөв олгоорой. Нийгэмд яригдаад байгаа 10 тэрбум төгрөгийн зардал бол Ардын хувьсгалын 100 жилийн ойг бүтэн жилийн хугацаанд тэмдэглэх, зохион байгуулах 45 арга хэмжээний төлөвлөгөөний зардал юм. Саяхан Ардын хувьсгалын 100 жилийн ойг тэмдэглэхэд зарцуулах хөрөнгөөс хэмнэлт хийж, эрүүл мэндийн салбар болон ковидтой тэмцэхэд зарцуулах шийдвэрийг Засгийн газраас гаргасан. Одоо УИХ-аар төсвийн зарцуулалтыг шилжүүлэх асуудлыг хэлэлцэж шийдвэрлэнэ. Гэхдээ энэ нь Үндэсний их баяр наадам тэмдэглэхтэй огт холбоогүй, тусдаа арга хэмжээ гэдгийг зөв ойлгох хэрэгтэй. 

Үндэсний их баяр наадмаар сур, бөх, морины уралдаан болж, эдгээрийг цахимаар ард түмэнд хүргэх Засгийн газрын шийдвэр хэвээрээ байгааг хэлмээр байна.

Цахим наадам зохион байгуулах баг томилогдсон. Ерөнхий найруулагчаар Н.Наранбаатар, продюсерээр Г.Цоггэрэл, туслах найруулагчаар Б.Баатар нар ажиллахаар бэлтгэлдээ орсон. 

---