Москвагийн оршин суугчид ес хоногийн турш цалинтай амарна

ОХУ-ын нийслэл Москва хотод энэ сарын 15-19-ний хооронд ажлын бус өдрүүдийг тогтоосон болохыг Хотын дарга Сергей Собянин мэдэгджээ. Ингэхдээ ажилтнуудын цалин хөлсийг хэвээр төлөх ёстой гэж тэрээр онцолсон байна.  

Собянин өөрийн блог дээрээ бичсэн мэдэгдэлдээ "Өсөн нэмэгдэж буй халдварын тархалтыг зогсоож, хүмүүсийн амь насыг аврахын тулд 2021 оны 6 дугаар сарын 15-наас 6 дугаар сарын 19-ний хооронд ажлын бус өдрүүдийг тогтоож, ажилтнуудын цалин хөлсийг хэвээр хадгалах тухай зарлигт би гарын үсэг зурлаа. Тиймээс Москва дахь "урт амралтын өдрүүд" 6 дугаар сарын 12-ноос 6 дугаар сарын 20-н хүртэл ес хоног үргэлжилнэ" хэмээн тэмдэглэжээ.

Мөн энэхүү шийдвэр нь өмчийн бүх хэлбэрийн аж ахуйн нэгж, байгууллагуудад хамаатай гэдгийг тэрээр хэлсэн бөгөөд "Гэхдээ мэдээж, хотын дэд бүтцийн үйл ажиллагааг хангахад чухал үүрэг гүйцэтгэдэг аж ахуй нэгжүүд, батлан ​​хамгаалахын байгууллагууд, "Росатом", "Роскосмос" болон бусад стратегийн аж үйлдвэрүүдэд хамаарахгүй" хэмээн тодруулсан байна.

Энэ үеэр мөн Москвагийн цэцэрлэгт хүрээлэн, тоглоомын талбай, спортын талбай болон бусад амралт, зугаа цэнгэлийн газрууд хаагдах аж. Харин хотын ресторан, кафе, баар, шөнийн клуб, караоке, боулингийн талбай, дисконуудыг 23:00-06:00 цагийн хооронд үйл ажиллагаа явуулахыг хоригложээ.

Эрүүл мэндийн мэргэжилтнүүдийн үзэж байгаагаар уг арга хэмжээ нь цар тахлын халдварын тархалтыг бууруулахад зайлшгүй шаардлагатай аж. Москвад өнгөрсөн долоо хоногт коронавирусийн 6,700 гаруй шинэ тохиолдол бүртгэгдэж, 2020 оны хамгийн дээд хэмжээтэй тэнцэх тоонд хүрсэн байна.

Үүний улмаас хотын коронавирусийн эмнэлгүүдийг дахин нээж, олон мянган орыг шинэчлэн тавьсан гэдгийг Сергей Собянин дурдсан юм.

Түүнчлэн Москва хотын эрх баригчид аж ахуйн нэгж, байгууллагуудыг ажилтнуудаа дахин зайнаас ажиллах горимд шилжүүлэхийг зөвлөж байгаа билээ. Мөн ахмад настнуудыг аялал жуулчлалаас татгалзаж, нийт иргэдийг халдвар хамгааллын дэглэмийг чандлан сахиж, вакцинжуулалтын хөтөлбөрт идэвхтэй оролцохыг уриалсан байна.

Эх сурвалж: TASS