Бразилийн эмч баталгаагүй эм санал болгон, "Youtube" сувгаа сурталчилж байна
Бразилийн мужийн төлөөлөгч ба эмч Альберт Диксон өөрийн "Youtube" сувгаа хөгжүүлэхийн тулд коронавирусийн эсрэг үр дүнтэй бөгөөд аюулгүй болох нь нотлогдоогүй эмийг олон нийтэд санал болгож байгаа аж.
Тус улсад цар тахлын нөхцөл байдал хүндрэн, иргэд бүхий л төрлийн тусламжийг эрэлхийлж байгаа юм. Тэгвэл нүдний эмч болох Диксон өвчтөнүүдэд "үнэ төлбөргүй эмчийн зөвлөгөө" өгөхөөс гадна халдварын эсрэг "урьдчилан сэргийлэх арга хэмжээ"-г зааж өгнө хэмээн мэдэгджээ. Гэвч үүний тулд иргэд түүний "YouTube" сувгийн дагагч болж, үзэгч гэдгээ нотлох ёстой гэж тэрээр шаардаж байгаа аж.
Альберт Диксон нь "ivermectin" гэх эмийг коронавирусээс урьдчилан сэргийлдэг хэмээн мэдэгдэн, иргэдэд санал болгож байгаа юм. Тус эм нь бөөс, хамуу өвчний эсрэг үйлчилгээтэй бөгөөд "Ковид-19"-өөс урьдчилан сэргийлнэ гэх ямар ч шинжлэх ухааны нотолгоо байхгүй гэдгийг эрүүл мэндийн мэргэжилтнүүд онцолжээ.
Диксоны зааврын дагуу "YouTube" сувгийг нь дагаад, түүнтэй холбогдон, зөвлөгөө авсан хэд хэдэн өвчтөний хэлснээр тэрээр мөн л "ivermectin" эмийг хэрэглэхийг санал болгосон бөгөөд өөрийнхөө "Instagram" хуудсыг дагахыг уриалсан байна.
Түүний "Youtube" суваг одоогоор 200 мянга гаруй дагагчтай болоод байгаа аж. Гэвч тус компаниас саяхан түүний 12 бичлэгийг эрүүл мэндийн худал мэдээлэл тараасан гэж үзэн, устгасан байна.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.