АНУ-ын Ерөнхийлөгч Жо Байден төрийн тэргүүний ажлаа хүлээж авснаас хойш хилийн чанад дахь анхны айлчлалаа хийлээ. Түүний айлчлалын эхний зогсоол Их Британи Умард Ирландын нэгдсэн вант улс юм.

Гэвч тэрээр анхны хилийн чанад дахь айлчлалынхаа эхэнд ОХУ-д анхааруулга, сэрэмжлүүлэг өгсөн нь хэвлэлийнхний анхаарлыг татжээ. Байден Оросыг хор хөнөөлтэй алхам хийвэл маш ноцтой үр дагавартай нүүр тулна гэдгийг хэлсэн байна.

Ерөнхийлөгч асан Дональд Трампын үед Америкийн холбоотон орнуудтайгаа харилцах харилцаа зогсонги байдалд орсон. Тэгвэл Байден ирэх дөрвөн жилд уг царцсан харилцааг идэвхжүүлж, хүчирхэг холбоо харилцаагаа эргэн тогтооно гэдгээ илэрхийлээд байгаа юм.

Байден Их Британид лхагва гарагт ирсэн. Их Британийн Ерөнхий сайд Борис Жонсонтой уулзаж Атлантын дүрмийг шинээр байгуулах хэлэлцээрийг хийх гэж байна. Энэ гэрээг Винстон Чөрчилл, Франклин Рузвельт нар 1941 онд анхлан байгуулсан ба орчин үед дахин шинэчлэгдэж, цаг уурын өөрчлөлт, аюулгүй байдлын сорилтуудад хамтын үйл ажиллагаагаа төвлөрүүлэх ажээ.

Байден Европ тивд найм хоногийн хугацаатай буюу урт хугацааны айлчлал хийнэ. Энэ үеэр Их Британийн хатан хаан хоёрдугаар Элизабеттай уулзах ба Бүлэг 7 орны дээд хэмжээний уулзалтад оролцоно. Тэрээр Ерөнхийлөгчийн хувиар НАТО-ын дээд хэмжээний уулзалтад анх удаа оролцох гэж байна. Айлчлалынхаа төгсгөлд Швейцарийн Женев хотод ОХУ-ын Ерөнхийлөгч Владимир Путинтай уулзахаар төлөвлөжээ.

Эх сурвалж: ВВС

---